Tolu tausaga o faatali se aiga ua maua le nofomau i Niu Sila

Ua tolu tausaga talu ona manuia pepa nofomau i Niu Sila o se ulugalii talavou e nonofo i Palisi ma le la fanau, ae e lei tuua lava Samoa talu ai ua piopio ma le faamaoni se ofisa malaga na fai ai o latou pepa ma totogi i ai pasese. O taumafaiga foi a le ulugalii na faaulu ai se tagi i leoleo faasaga i le tamaitai pule o lea ofisa malaga sa tuuaia i se taimi e lei mamao, i le taofiofi e lona ofisa malaga i Niu Sila o tusifolau o tagata talosaga.
O le tagi a le ulugalii sa faatoai i leoleo mo le toe fia maua mai o le silia i le limaafe tala na totogi i le tamaitai pule ua le manuia, ina ua faaui i tua e leoleo le mataupu e mafua ua fiu e sue le faila o le tagi ua leiloa poo fea ua galoma i ai. O le taimi nei ua sulufai le tina ma lona aiga i le faalapotopotoga o le Toomaga mo Ē Puapuagatia mo le fia maua o se fesoasoani, ae ua le toe maua lava se feiloaiga ma le tamaitai pule o le ofisa malaga.
Ua tuuaia e lea aiga le Matagaluega o Leoleo i le le mafai ona faataunuu le mataupu ona e foliga e iai ni faiga faaalatua ua le mafai ai ona suesueina e le faamasinoga. O le tausaga e 2005 i le masina o Me na fuafua e tuua ai Samoa e le ulugalii ma le la fanau mo Niu Sila. Na faamatala e le tina o Eusegia na faatonuina e le ofisa malaga e totogi loa pasese e silia i le $4,000 afe tala ua manuia gaioiga uma o o latou pepa, peitai sa ia manaomia a latou ticket o le vaalele ae o le faamatalaga a le tamaitai e ana le ofisa malaga, e leai se mea e popole ai e faatoa tuulima atu lava pepa malaga uma i le malae vaalele. E oo mai i le taimi nei e lei silasila lava le aiga i ni foliga o tickets ua uma ona totogi.