O le mea e lelei i Upolu, e lelei foi mo Savaii. O le anavatau masani a le HRPP le vaega faaupufai e puipuia aiā tatau a tagata, i le atina‘e faagasolo a le Malo lea ua molimauina le faagasolo i le amataga o le tausaga.
E 3 ni auala galue ua tatalaina aloaia i le amataga o le tausaga e pei ona molimauina i le afioaga o Salailua, Gataivai ma Satupaitea. O le faamoemoe sa fauao, faupo, lenei ua taunuu ma le manuia, ma o se fiafiaga i nei afioaga ona ua lelei auala e faatino ai a latou galuega ma fuafuaga fai.
Na auai i nei faamoemoe sui o le Malo, le aufaigaluega o le Pulega o felauaiga i le laueleele, ma sui o afioaga taitasi, e molimauina le faaiuga o nei galuega ua tino mai.
O le Afioga i le Alii Palemia, Susuga Tuilaepa Sailele Malielegaoi na saunoa i le saunoaga autu, o ia foi na saunoa i tala faatatau o nei galuega, ma o le afioaga o Salailua, na tomua i le tatalaina o le latou auala galue.
“O le auala ua mae‘a fausia (i Salailua) 2800 mita (2.8km) lona umi, 6 mita le lautele, e ese mai ai ma alavai, ae 5m ua faatāina. O le tau na fausia ai le auala e $714,000.00 tala Samoa, ma o le tau aupito maulalo foi lea na manumalo ai le Kamupani a le Sakalafai Contractors Ltd i tauofoga faalauaitele a le Malo sa faia i le masina o Iulai o le tausaga talu ai.”
“Tasi lenei o auala e lē mapu le fesili ai pea o le sui faipule o le afioaga o Salailua po ua talia le latou talosaga ae amata foi afea le galuega.”
O nei galuega uma o fuafuaga a le Malo o loo faia i lalo o lana polokalame faasolosolo o loo nafa ma le Pulega o felauaiga i le laueleele. O le auala lona lua sa tatala, o le auala galue o le pitonuu o Masalaolao i Gataivai.
“O le galuega lenei na tauofoina i le masina o Iulai o le tausaga na tea nei. I tauofoga masani a lo tatou Malo, e fua i ata ma fuafuaga faataatitia lea sa nafa ma le LTA i le mae‘a ai o iloiloga masani, na manumalo ai le Kamupani o le Apia Lua Ltd, ma o latou amatalia ai loa lenei galuega i le masina o Aukuso i le tausaga talu ai. O le auala la lenei e 2,000m (2.0km) lona umi, 6m le lautele, e ese mai ai ma alavai, ae 5m le lautele ua faatāina. O le tau atoa o lenei galuega e $518, 000 SAT ma o le tau aupito maulalo na manumalo ai le Kamupani o le Apia Lua Ltd.”
E lē o se polokalame mo na o se nuu pe na o se itumalo, ae mo nuu uma o le atunuu. E lē na o se tausaga pe na o ni nai tausaga ae e faaauau pea seia soo nuu uma o le tatou atunuu. O fuafuaga alumamao nei a le Malo na ta‘ua e le alii Palemia ina ua tatala le auala o Satupaitea.
“O le galuega atoa o le auala lenei, e 2000m le umi o le auala fou ua faia ma faatāina le lautele e 5m, faatasi ma le umi e 950m o le auala tuai sa faatāina muamua, ua toe faaleleia ma ua toe faatāina.
O le lautele o le tā tuai ua toe faatāina e 4m. e aofia ai foi i le galuega lenei le faatuina o se auala sima mautu ma maualuga, i le vaega o loo malosi ai le kolosi o le vaitafe i uta, ma ua faigofie foi lea vaega e fai ma mataaga e omai ai turisi, aemaise lo tatou afioaga e taeele ai ma faamalulu ai i aso vevela.
O le tau atoa na fausia ai lenei galuega e $510,000 ma o le tau aupito i maulalo foi lea ina ua mae‘a tauofoga faalauaitele a le Malo sa faatautaia, na manumalo ai le Kamupani o le TM Transport Ltd. 2.
O le afioga i le Minisita o Galuega, Felauaiga ma Atina‘e eseese, le Afioga Manu‘alesagalala Enokati Posala ma le afioga i le Minisita o Tupe, Susuga Faumuina Tiatia Liuga na ave i ai le faaaloalo la te ootiina lipine e tatala ai nei galuega.
Ua avea suiga ua iai nei auala faapea auaunaga e pei o eletise, suavai ma le telefoni, ua siitia ai i se tulaga lelei le itu tau le siosiomaga faasoifua maloloina ma le tamaoaiga o tagata o ia afioaga.
O loo iai nisi o auala o afioaga o loo faasolo i ai galuega fuafuaina a le Malo, ma o loo fua lava le faasologa i tupe faaagaga mai lea taimi i lea taimi.
