Toe fia ofi i meafai a le atunuu

O loo fesiligia pea e le toatele o le atunuu le autu o le faatuina o le faalapotopotoga lea e ta‘ua o i latou ua toe faafoi mai i Samoa. O lea faalapotopotoga ua ofi atu i ai alii ua toe faafoi mai i Niu Sila, Hawaii, Amerika ma Ausetalia faapea foi Amerika Samoa, sa o latou solia le tulafono ma na mae‘a loa ona tuli o latou faasalaga i atunuu sa aumau ai ona toe faafoi mai loa lea i Samoa, o se isi vaega lea o le latou faasalaga.
O le toatele o i latou nei e toe foi mai e leai ni aiga e masani ai pe iloa foi, a lē o lea ua lē o toe talia e aiga ona o le luma o aiga ia latou gaioiga ma soligatulafono.
O le toatele foi ua toe aafia lava i le tulafono ona o le leai o se fautuaga ma se fesoasoani ua o latou maua i le toe foi mai ai i Samoa.

 
O lea la ua mautu le tulafono ua pasia ai le faatuina o le faalapotopotoga lenei, ma o Vernon McKenzie lea ua ia vaaia atoa ai a nisi lava ua tofia e fesoasoani i soifua o nei tagata, o tagatānuu lava o Amerika Samoa ma ua faapea ona taumafai e toe faaofi i latou nei i totonu o le atunuu, i meafai a nuu, ekalesia ma le atunuu.
O le faalapotopotoga lenei ua i lalo o le vaavaaiga a le Loia Sili a le Malo o Samoa ma ua tuufaatasi nei alii, faatalatalanoa auala e toe unai ai le fia galue, fia auauna i le atunuu ma le fesoasoani ia mafai ona o latou maua e ala i mafutaga nei e faatalatalanoa ai luitau o feagai ma i latou aemaise o le sailiga o auala e mafai ai ona faaleleia le soifua o i latou nei ua aafia i soligatulafono.

 
O le tasi o polokalame tele lava ua faatautaia e lenei faalapotopotoga o le ofo atu o lo latou taimi e toe fausia ma faamamā ai nofoaga e pei o le Maota mo tamā ma tina matutua i Mapuifagalele. E lē gata i lea o lo latou auai atu e unai fesoasoani auā sailiga seleni a le faalapotopotoga mo i latou ua ta‘ua o kekea.
O le faaiuga o le vaiaso na ofo atu ai le latou fesoasoani i le toe vali atoa ma le faamamāina o le nofoaga mo i latou e iai manaoga faapitoa i Moamoa. Le nofoaga lea ua ta‘ua o le Goshen Trust.
O se nofoaga lenei mo alii talavou lava ia, poo i latou ua matutua foi ae ua leai ni aiga e toe agai i ai ma ua mafai ona maua le nofoaga e tausi ai le soifua maloloina ma le soifua manuia lautele e lenei faalapotopotoga ua ta‘ua o le Kosena poo le Goshen.

 
O le galuega na faatautaia ua iai le faamoemoe o lenei faalapotopotoga o sui ua toe taliu mai i Samoa ina ia faaauau e pei foi ona o latou fesoasoani ai i galuega toe faaleleia i Mapuifagalele.
O le faafetai a le Goshen Trust ona o lea ua iai nisi e amanaia le latou foi galuega fesoasoani o loo fai ma oo atu e tau faamamā ma toe fausia vaega o lea nofoaga ua faaletonu auā lava le saogalemu o i latou e iai manaoga faapitoa o le mafaufau ua vaaia i lea nofoaga i Moamoa.
Le alii o Vernon McKenzie Se tasi o alii o lenei faalapotopotoga o loo faia galuega faamamā