O taitai mataala ma magafagafa, e fetalai le faautautaga ina ia faamautinoa, o soo se faaiuga ma fuafuaga e faataatitia, o le a aoga ma manuia ai tagata uma o se atunuu, faalapotopotoga, aai, e oo lava i totonu o ekalesia ma aiga.
Ua le o toe po se lilo i le faafofoga i le tele o faasalalauga, ua toe faatetele mai le pepesi a le fulu lea o loo fai sina faafefefefe i ai o le vaega a le soifua maloloina i lenei foi vaitau, le swine flu, ona o se taimi muamua lenei ua aliae ai lenei fulu, ma e lei mautinoa lelei foi se vailaau e tatau ona vave tineia ai.
O le ala lea o le ae o se tofā i le afioga ia Teleiai Edwin Puni, o se tasi foi o loo tele ina faauluulu i ai nisi o meafai a komiuniti a Samoa, ma o loo nafa ma le faalauiloaina o le faagatama o le faipele i totonu o Niu Sila, o le a toe suia se tasi o fuafuaga na faatulaga ai le fusuaga sa tatau ona faia i le Aso Lua o le vaiaso nei.
O le mafuaaga autu lea, ina ia faaitiitia avanoa e vave ai le pepesi solo o lenei faamai, aemaise lava i taimi e tumutumu ma faatasitasi ai tagata, ae o loo iai ma nisi i lena faatasiga o loo aafia i le fulu.
O le taimi nei i faamaumauga fou mai le Matagaluega a le Soifua Maloloina i Niu Sila, ua oo atu nei i le toafitu tagata ua faamautinoa le maliliu i le swine flu, ae le taulia ai nisi o loo iai le talitonuga o loo taumafai lava e togafitia i aiga o latou fulu e ui ina fautuaina malosi le oo atu pea i le falemai.
Na saunoa Mr Puni e pei ona iai i se pepa o faamatalaga na oo mai, ‘o le manaoga o le Event Polynesia Boxing, ia taulamua latou i le faia o se gaoioiga e fesoasoani ai i le tau faaitiitia o le pipisi atu o le swine flu i Niu Sila ma isi vaega uma e ono oo i ai.’
Ta’ua e Mr Puni, o fusuaga nei e pei ona fuafua e faatautaia i Otara, o se avanoa o le a vave pepesi ai le swine flu, aua e faitau fia selau o le a auai, o le toatele lava o tagata Pasefika mai itu uma o Aukilani, aemaise foi tagata fusu mai isi vaega o Niu Sila faapea ma Samoa.
E lei toe faamautinoa mai la e Puni se isi aso o le a faataunuu ai lenei faamoemoe o le Event Polynesia.
