Ua ioe le tamaitai muamua ua tuuaia i lona faia o se faiga e faamuta ai sana maitaga i luma o le Faamasinoga Maualuga. O lea tamaitai o Ruby Slade, sa taua i lipoti na ia faia se gaioiga ua faapau ai lona maitaga ma o se solitulafono lea o loo faamalosia lava i Samoa.
Sa iai se isi tamaitai na faasala faafalepuipui muamua i lenei tuuaiga, ae o se tamaitai tausi soifua o Akalita Apelu ae le o ia tonu e ana le maitaga, ae ua fesoasoani i nisi o tamaitai i le faamuta lea o o latou maitaga. Ae o le tagata muamua lenei ua maua i le maitaga ua tuuaia i Samoa i lenei soligatulafono.
Faaalia e nisi o lipoti faapea o lea tamaitai na ia faia lenei gaioiga solitulafono a o faasala ai i le toese i Tafaigata i se isi moliaga. Na faamaonia mai e le Komesina Lagolago o Leoleo, Papalii Li’o Ta’eu Masipa’u faapea o lenei tamaitai sa tuli sona faasalaga i Tafaigata peitai na te lei faia lenei gaoiga i totonu o Tafaigata. E masalomia na faia e lenei tamaitai se taotoga e faapau ai lona maitaga a o malolo ai i palola o le faaiuga o le vaiaso lea e faataga ai nisi o pagota e asiasi i o latou aiga.
O lenei mataupu ua toe tuuaia ai foi Akalita Apelu, le tamaitai lea na galue faatausimai i le fesoasoani e faamuta le maitaga a Ruby Slade. E ese la le taimi ua faatulagaina e le Faamasinoga e faatautaia ai le tagi ua faia faasaga ia Apelu peitai o le tamaitai o Ruby Slade ua ia ioe i le moliaga ma ua talia nei le lauina o lona iuga i le vaiaso fou.
E faaauau finauga i lenei mataupu e pei ona feteenai ai pea i latou o loo i le auaunaga faafomai ma i latou o loo taitaia lotu i le atunuu ona o le tele o aafiaga o lenei mataupu. O le mau a nisi o fomai e pei o le afioga ia Papalii Dr Viopapa Anandale, atonu ua tatau ona tuu atu i le atunuu lenei mataupu aua se isi auala e mafai ai ona taofi faafitauli o tamaitai talu ai le maua i maitaga le manaomia.
Na ia faaalia ina ua laga i le vaitau na lafoai ai le pepe a se tamaitai Samoa i luga o le vaalele o le PolyBlue ina ua taunuu i Aukilani i le amataga o le tausaga, atonu o le faatulafonoina o le faia o taotoga e faamuta ai maitaga o se auala lea o le a taofia ai le tele o le pepe lafoai ma le tele o tina ua faaletonu soifua i Samoa ona ua maua ane, ua taumafai e faapa’u le maitaga ae ua faia i ni auala ua aafia ai ma soifua o nei tamaitai.
O nisi ua taumafai auala e pei o le saofai i luga o paelo ua toeititi tumu i le vaivevela ma le talitonuga e mafai ona faapa’u ai le maitaga i le faaaoga o le ausa. E le gata i lea o nisi tina ma tamaitai ua maitaga ua sosoli tua ma manava ma taumafai lava soo se auala e faamuta ai o latou mai.
Peitai o le toatele e iu ai lava o latou soifua ma aafia ai foi a latou pepe i le fananau mai ai. “O le tele o isi teine talavou e matua aafia o latou olaga ona ua tauave maitaga le manaomia ma e fai o le aafia ai o le mafaufau, aemaise pe afai o le maitaga e mafua mai i sauaga mataga, ae o le aafia ai o le ola o le teine talavou aua e lei taitai sauni ona totoga mo le tauaveina lea o ni pepe,” o se mau lea na faalauiloa e le tamaitai fomai o Papalii.
Ona pau lava le taimi e faataga ai e le Tulafono i Samoa le faia o se taotoga faapea o le taimi ua faamautu ai e Fomai o le tina e maliu pe a le tuueseeseina ma se pepe o loo ia tauaveina, ae o se isi faiga e matua tapu lava i le tulafono.
O le tali a le susuga i le toeaina, le Taitaifono foi lea o le Fono a Ekalesia Soofaatasi i Samoa, le susuga Oka Fauolo, o le a lava le auala e vaavaai ai i lenei mataupu o le fasioti tagata lava ua fai pe a faataunuuina. “O le vaavaai foi i le tulaga o maitaga le manaomia, e leai se tagata e fanau mai i le lalolagi lenei e leai se faasinomaga, ma e tusa pe faapea mai o tamaiti e maua mai i sauaga ma auala mataga, o loo iai lona nofoaga i le lalolagi lenei ua maea saunia e le Atua ma e le tatau ona vaavaai i ia auala o se fofo o faafitauli,” o le saunoaga lea a le susuga i le Toeaina ina ua fesiligia i lenei mataupu.
Ua unaia e le Soifua Manuia o Aiga (Family Health Center) puipuiga a o lei oo i lea laasaga. Taua e le Pule o lea faalapotopotoga o Apineru Peniamina, afai e puipuia tamaitai talavou ma le loaloa o tina i auala faaaiga fuafuaina, e le tulai mai ai ni finauga faapea aua o le a malupuipuia tamaitai mai le ono maua ai i maitaga le manaomia.
O aoaoga faagasolo a lenei faalapotopotoga i aoga maualuluga i Samoa o loo muai unai ai le ola o tamaitai talavou i se olaga Kerisiano ma mulimulitai i aoaoga nei ina ia mafai ai ona tetee atu tulaga faapea. “Ae afai o ni maitaga ua maua ai teine talavou ona o sauaga ma faiga aiga faamalosi, e tatau ona vave logo le falemai ma i matou ona mafai lea ona fai i ai se fesoasoani a o lei oo i le tulaga ua maua ai i le maitaga le manaomia,” o se faamatalaga lea a Peniamina i lenei mataupu.
O le vaiaso fou e lau ai le iuga o le tamaitai o Ruby Slade ae tālia ai le mataupu faasaga ia Akalita Apelu.
