“Faamolemole aua le faatauina e fai ai se pu o se pasi”… Maulolo Tavita
E foliga e mālie ma faaataata lafoga le tuu-a-lalo a le Pule Sili Lagolago o le Matagaluega o Tina ma Tamaitai, Atinae o Nuu ma Aga Fesootai, le tofa Maulolo Tavita i le mamalu o Pulenuu ma Sui o le Malo, ia vaavaai lelei pu faailo o se sunami, ina nei faatau foi e se isi ma fai ai se pu o le pasi a lo latou nuu, ae o loo iai se feau taua i le vaaia lelei o ia meatotino taua ma aoga e lē gafatia e le atunuu ona faatau.
O se meaalofa na foai mo Samoa e le Malo o Amerika, ma o se fuafuaga na faataoto e lea Malo i le tuanai o le sunami i le tausaga ua mavae lea na maliliu ai le toatele o tagata o si o tatou atunuu.
Ua faafiafiaina nuu ma afioaga e tu lalata i le sami ua maua se meaalofa taua mai le Malo o Amerika, o pu feei leo tetele e logo ai le faailo o se sunami o le a taia ai Samoa.
O se fiafiaga foi i le Pule Sili o le Matagaluega o Punaoa Faalenatura ma le Siosiomaga, le afioga Taulealeausumai Laavasa Malua, o le taitaifono o le Komiti faufautua mo faalavelave faafuasei, ona ua vave maua e nuu ma afioaga e lalata tele i le sami se foai faapea o le a vave ona logoina ai tagata o nuu, na i lo le tatā o logo e atili fefefe ai nisi.
O le isi tulaga, a ta le logo e faapea tagata o se faigalotu poo se faailo o se maliu, ae o pu leo tetele ua aumai e le Malo o Amerika, o le a sili ona vave silafia ai pe a tatā, o le faailo o le sunami.
Na faaalia e le susuga Taulealeausumai Laavasa, o loo silasila le Malo i nisi auala e vave logo ai le atunuu i se sunami e pei o le faatutu o ni sailini i luga o nofoaga maualuluga, peitai o se fuafuaga e umi se taimi ona faatoa faatino lea. Peitai o pu faailo o sunami ua taulimaina nei e le silia i le 200 nuu ma afioaga i Upolu ma Savaii, o se tulaga lelei aua e sili ona vave le logoina o tagata i le faaaoga o ia pu faailo.
O le Aso Lulu, 24 o Mati na tufatufa atu ai lea meaalofa mo Upolu ae o le Aso Tofi na sosoo ai na oo ai le tufa mo nuu tu lalata i le sami i Savaii.
O le sui failautusi o le Malo Amerika mo mataupu tau atunuu Asia ma le Pasefika, le tamaitai o Frankies Reed na malaga i Samoa e avea ma sui o lona Malo faatasi ai ma le sui o Amerika i Samoa, le tamaitai o Robin Yeager e tauaao lea foai taua ma aoga tele i le Pule Sili o le Matagaluega o Puanaoa Faalenatura ma le Siosiomaga.
E 362 pu faailo ma leitio e 362 ua foai e lea Malo mo Samoa aua tapenaga o se sunami.
