E lei auai Tautai Fata 47 tausaga o Afega i le gaoiga o tupe o le penisione a tagata matutua lea na gaoia mai le ofisa o le NPF i le tausaga e 2008 i le masina o Oketopa, ae ua faamaonia e le faamasinoga ona moliaga o le talepe fale gaoi, ona ua ioe le faamasinoga e ui ina sa le auai o ia i le faatinoga o le solitulafono, ae o ia na fafauina atoa le gaioiga na faatino e Sione Taateo lea foi ua falepuipui ona o lea lava gaoiga.
O le Aso Faraile na tea nei, 26 Mati 2010 na faatoa fofogaina ai le faaiuga o moliaga o Tautai ice Fata, lea ua faasalaina ai i le lima tausaga ma le masina e tasi i le falepuipui. O le faaiuga a le faamasinoga e le aafia ai le faaiuga a le Komiti o le palola ua toe tuli ai le faasalaga soloatoa o Tautai mai le moliaga o le fasioti tagata faamoemoeina sa faasala muamua ai, ina ua ia le usitaia tuutuuga ma aiaiga o le palola na magalo ai.
O le faaiuga a le alii faamasino o Justice Pierre Slicer, ua ia folasia ai e faapea sa silafia lelei e Tautai le nofoaga sa teu ai tupe o le penisione. Na tupu le soligatulafono na faatino e Sione Taateo, o loo faigaluega Tautai i le NPF o se ave taavale. Faaalia e le alii faamasino o le gaioiga na fafau e lē ua faasalaina ma molia ua faamaonia ai ua na telepe le faatuatuaga na ave ia te ia e le Faalapotopotoga o le faaputugatupe a le NPF sa faafaigaluegaina. Talu ai lona sao i le fafauina o le gaoiga, na faaalia ai e le faamasino e tatau ai ona ese le faatinoga o le faaiuga mo ia.
E 6 ma le ‘afa tausaga na amata ai se fua a le faamasinoga i se faasalaga peitai e iai foi itu lelei i le lagolago atu a Tautai i nisi o suesuega ma sailiiliga a leoleo. Na faapau ese ai le tausaga e tasi ma masina e 5, ona totoe ai lea o le 5 tausaga ma le masina e tasi lea ua faasalaina ai i le falepuipui. Sa fesiligia lana loia le afioga Leuluaialii Tasi Malifa i le faaiuga pe faamata e toe apili. O lana saunoaga e le o iloa lea tulaga i le taimi nei.
O le faasalaga soloatoa ua toe tuli na faaalia e le alii loia o lona malamalama i ai, ua soloatoa lava le olaga o Tautai i le falepuipui e le toe maua se avanoa e toe talosaga ai i le palola. O lē ua faasalaina ua faaipoipo ma e iai lana fanau.
O le aso 29 o Oketopa 2008 na nofo taofia ai Tautai i le vaaiga a leoleo ina ua tuuaia i le gaioiga o tupe o le penisione. O le taimi atoa sa nofo taofia ai a o faagasolo suesuega a leoleo seia oo ina faia le iuga a le palola e toe tuli lona faasalaga soloatoa, o le a toesea mai i le faasalaga e lima tausaga ma le masina e tasi.
