O le uluai taimi lenei ua afea aloaia ai Niu Sila, e le tamaitai ua iloga i Samoa i lana taleni o le saunia o laei, e lē gata i le suisui, ae o le mamanuina o soo se ituaiga o laei i sikaili eseese faaonaponei ma laei foi o loo atagia ai lava uluai mamanu mao‘i a tagata Samoa. Peitai, o le “Cecilia’s Fashion House of Samoa” ua loa ona silafia e i latou ua laeiina ma silafia foi le matagofie o lavalava a lenei tamaitai faipisinisi.
O le Aso Faraile talu ai, aso 7 o Tesema, na afea ai le nofoaga o le Pacific Business Trust i Otahuhu, o ina sa faalauiloa ai laei eseese i soo se fua ma soo se sikaili a Cecilia Keil ma le Cecilia’s Fashion House of Samoa.
E na o le pau lava lena o le aso sa faalauiloa ai nei lavalava, e ui o loo tagatagai pea Cecilia, i se fuafuaga i le lumanai e ono faamautu ai se nofoaga o le pisinisi i Aukilani nei poo se isi lava vaega o Niu Sila.
Na saunoa Cecilia Keil, o lenei taleni, na amata mai e na o se mea sa fiafia ma manao e fai (passion) e faataitai ai pe moni lona tomai e su‘i ni laei, ae sa mamao se manatu o le a iu ane i se tulaga ua mautu ai se pisinisi faapenei. O le tausaga e 1997 na amata mai ai lava i se falesuisui.
Mulimuli ane i le 2001 ua faatulaga loa le falesuisui i luga o le fale o Eveni Carruthers i le taulaga i Apia. Ua ola pea le pisinisi ma iu ai i le tausaga e 2003, ua see mai loa i luga o le fogafale a luga o se fale a le alii faipule o Joe Keil, o se uso o le toalua o Cecilia, le alii o Conrad Keil.
Ma ua lē na o se falesuisui, ae ua faalautele atu i le mamanuina (design) o ituaiga sikaili eseese o laei o alii ma tamaitai.
O le oo mai la o Cecilia i Aukilani, sa fia tofotofo lava pe faapei le alumia o ana lavalava i Niu Sila, e fua i ai nisi fuafuaga mo se taimi e lē o toe mamao.
E silafia lelei e le komiuniti a le aufaipisini i Apia le Cecilia’s Fashion House of Samoa, auā e tele tausaga sa manumalo ai foi ana ofu na ia saunia mo nisi o tamaitai tauva i le Miss Samoa.
O nisi o ia Miss Samoa sa fai e Cecilia a latou teuga i taimi a o pale i le Miss Samoa, e iai Mary-Jane Moe McKibbin (1997-1998), Cheri Robinson (1998-1999), Taralina Gaee (1999-2000).
O teuga o loo mātele i ai Cecilia, o fua ua fiafia i ai alii ma tamaitai i aso nei, ae o le itu sili ona manaia, ona o loo taumafai lava Cecilia e faaolaola mai pea le auala e valivali lima ai mamanu o ie e pei ona sa masani mai ai Samoa, e ui o loo faafefiloi foi ma mamanu faaneionapo.
Ua iai le faleoloa i Sini ua agai i ai lavalava a le Cecilia’s Fashion House of Samoa, ma e molimauina le alumia tele o laei, ua telē foi le manaoga i isi vaega o Ausetalia.
Ona o le taimi nei e lei faamautu se nofoaga o le Cecilia’s Fashion House i Aukilani, ae mafai lava ona faafesotai sa‘o i Samoa i lo latou nofoaga autū i Vaigaga, le nofoaga ua masani ai le atunuu, le falekeke o Auntie Lanu, ma ota ai lavalava.
E lē tasi se pisinisi o loo faatautaia e Cecilia ma lona alii, le susuga Conrad Keil. E ese mai le falesuisui ma le mamanuina o laei, ae iai foi se pisinisi mo faleie/nofoa e faaaogā i faatasiga tetele (Party & Function Hire), se kamupani construction ma nisi lava pisinisi laiti o loo faagasolo i Samoa.
