O galuega o le vaaia lelei o le saogalemu le security o usugafono e silia i le toluafe mai atunuu e 153 o le a auai i le fono a malo laiti o le lalolagi o le a usuia i Samoa mai le faaiuga o Aukuso e oo i le amataga o Setema o le tausaga nei, e lē faigofie. Peitai ua faailo e le afioga i le Minisita o le Matagaluega o Leoleo ma Falepuipui, Salā Fata Pinati, o le afioga i le Komesina lagolago ia Fauono, o se tasi o leoleo sinia ua leva tausaga o galue i le matagaluega o leoleo ma falepuipui, ua lava lona silafia i galuega tau i le saogalemu.
Na faailoa e le minisita le avea o Fauono Talalelei Tapu ma Commander-in-Chief a o saunoa e faamalamalama le teuteuga o le tulafono e tetee atu ai faiga faaterorisi i tauaofiaga a le Palemene i le Aso Tofi ua mavae. Sa faailoa foi e le minisita lea tulaga ma lona naunau e faailoa i le Palemene ma le faafofoga a le atunuu tapenaga ua taoto mo le vaaia o le saogalemu o lea fonotaga tele faavaomalo. Peitai sa faauilavea le Sui palemia le tofa Fonotoe Nuafesili Pierre Lauofo ma ia fautuaina le alii minisita e silasila i le malu puipuia o faamatalaga uma faasino i le puipuiga o le saogalemu ona o vaega ma‘ale‘ale e lē tatau ona iloa uma e tagata. Na masaa ane ai ma se lafoga a le Sui palemia ma ave lana tuualalo i le minisita, e tatau foi ona silasila lelei i le tulaga o le a ia folasia auā e faalauaitele loa, e alofa i le minisita ina ne‘i iai se mea e tupu ae fiu e toe sue lana Commander-in-Chief ua leiloa poo fea o iai.
E faaataata lafoga lea saunoaga a le Sui palemia i le naunau atu o le minisita o leoleo e faailoa polokalame ua faataoto o le malupuipuia o le saogalemu, ae na toe taofi lea tulaga ma agai ai loa le minisita e tali fesili a sui faipule agai i le teuteuga o le tulafono e tetee atu ai faiga faaterorisi. Ua mae‘a ona faailoa e le sui failautusi o Malo Aufaatasi sa asia Samoa mo le fia silasila i tapenaga ua iai mo lea fono tele, o leoleo a Malo a Aufaatasi le UN Police o le a leoina totonu o nofoaga o le a faagasolo ai lea fonotaga. O lona uiga o alii ma tamaitai leoleo i Samoa o le a galulue i le vaia o le saogalemu o isi nofoaga e nonofo ai usugafono faapea le saogalemu o fafo o nofoaga uma o le a faaaogā mo lea fono tele. Ua faaalia e le Minisita, le afioga Sala Fata Pinati i le Palemene, ua lava saunia le Malu o le Malo mo lea tiute tāua.
