E 85 afe le tau o le taavale fou mo galuega laveai poo se Ambulance ua tauaao nei e le pulega o le fuimu ma galuega laveai i taimi o faalavelave tutupu faafuasei, o se foai a se tagatānuu o Siamani. O se fesoasoani tāua ua maua ai se isi taavale ua tolu ai ambulance mo le faia o galuega laveai a lea auaunaga mo le atunuu lautele. Na auala mai lea foai i se talosaga na ave e le konesula o Siamani i Samoa o Arne Schreiber o se Honorary Consul.
O se alii Siamani na galue fesoasoani mo le pulega o le fuimu i le tausaga e 2010 na taulamua i le sailia o seleni na auala mai ai lea foai, ma o lea samaria agalelei sa ia foai muamua foi se umuka e mafai ona feaveai lea ua faatotogaina i vaega uma e gasegase ai taumafa ma e mafai ona fafaga ai le faselau o tagata. O se foai tāua foi mo taimi o faalavelave faafuasei e pei ona faaaogā e le pulega o le fuimu.
O le tele o galuega laveai i taimi o faalavelave tau taavale faapea mu poo nisi lava ituaiga o faalavelave ua faatino e le pulega o le fuimu. O se faaopoopoga tāua lea i le latou auaunaga o se isi taavale mo galuega laveai ma ua faatotogaina i vaega uma e manaomia mo ia ituaiga o galuega. O loo faatalitali le pulega o le fuimu pe maua se foai faapea mo lana tautua i Savaii.