Toe tatala le falemai au mai suka

O le a toe tatala i le vaiaso lenei le ofisa ma le falemai o le sosaiete o le mai suka o loo i tua o le maota o Pulenuu i Matagialalua, ae o le a faafoe e se fomai ma tausi soifua mai le Matagaluega o le soifua maloloina.
O le faaiuga lea ua faia e le Malo ina ua maea ni feiloaiga i le va o sui o le sosaiete ma le Palemia faatasi ai ma le tamaitai Pule Sili o le Matagaluega o le Soifua Maloloina, o Palanitina Tupuimatagi Toelupe.
O le vevesi a le sosaiete e pei ona fesiligia ai le faaaogaina o tupe ua faaalia e le pule sili o le matafaioi lava lea a sui o le saili o se fofo, ma e faatoa toe tuulima i ai le faafoega o le falemai ma le ofisa pe a toe sologa lelei faafitauli o loo lagomia ai finagalo o se isi vaega o le sosaiete.
O le fomai o le a galue ai e tatau ona totogi e le sosaiete ia latou tupe aua o le aiaiga lava lea sa iai ina ua faavae le faalapotopotoga o le au mai suka, ae mo le taimi o le a toe tatala ai o le a galue ai se fomai e totogi e le Matagaluega o le Soifua Maloloina faapea ai ma tausi soifua.