Ekalesia Reform Christian Churches of the Pacific in Australia
E matauina lava le tulaga manuia o le soifua tapuai o o tatou tagata Samoa i lenei foi atunuu tele. Ui ina tau le asa se aso ma se faalavelave, ae i le lotolotoi lava latou o komiuniti a Samoa ma le Pasefika, o loo malosi ai le soifua tapuai i le Atua.
E iai foi la le taeao o le Aso Sa, aso 13 o Setema 2009 i le 11 i le taeao na faataunuuina ai se sauniga lotu taualoa i le malumalu o le ekalesia Uniting Church i Campbelltown, i le faauuga o le susuga i le alii faifeau ia Vili Iosua mai le afioga o Gautavai ma lona faletua ia Folose.
O le taitai fono o le lotu poo le Moderator o le Reform Christian Churches of the Pacific in Australia, Rev. Nini Vini na ia taitaia lava lea sauniga mamalu, ma sa faitauina afioga Paia a le Atua e Rev. Ona Sei Ariki ma Rev. Temuana Raggini i le gagana Peretania, a o tiakono o le lotu Samoa lenei i Campbelltown sa faitauina le Tusi Paia i le tatou lava gagana.
I le faagasologa o le polokalame o lea sauniga taualoa na tulai ai le failautusi o le ekalesia, le afioga Misa Viali Lematua e valaauina faaaloalo lo latou faafeagaiga ia Vili ma le faletua ia Folose ina ia susū atu i luma mo le taliaina aloaia o le tofi Toeaina.
O le failautusi o le Reform Christian Churches of the Pacific in Australia sa fofogaina tiute ma galuega e tatau ona faatinoina e le susuga i le Toeaina, ina ua maea sa tulai loa le taitai ia Rev. Nini Vini e faamanuia faatasi ai ma faifeau sa auai i lea aso, le susuga Rev. Itione Faavae-Eli o le PIC Tutoatasi a Minto, o Rev. John o le Uniting Church a Campbelltown aofia ai ma le laulau a le RCCPA.
E le gata ina tatalo mo le tofi Faifeau Toeaina ua faaee atu ai o latou aao ia Vili ma Folose Iosua ae sa faamanuia foi mo lo la tulai mai i lea itulagi o Ausetalia ina ia maua ni agaga se tele mo le Atua ma lona malo.
O viiga matagofie ma le siufofoga malie o lea sauniga sa lagiina lava e le aulotu Samoa lenei i Campbelltown i lalo o le taitaiga a le tamaitai faiaoga ia Liz, o le alo o Ramota Hilton ma o ta piano talavou o le alii o Paul Ite ma le tamaitai o Terisa Petaia.
E sefululua matafale o lenei aulotu Samoa e ese mai ma matafale galulue fesoasoani o loo asiasi atu pea i taimi o sauniga. E le gata ina molimauina e le vaega o talafou lea sauniga mamalu ae sa faapena foi ona maitauina nisi o le atunuu na auai atu i ai pei o le Misionare o le LMS Toefuataina ia Sieni Lapiti Lemalu Tuigamala, o le afioga ia Iumalo Sonny ma le faletua ia Fuatino malaga mai Samoa ma nisi o tulatoa ma tulati o le atunuu na molimauina lenei faamoemoe.
O le susuga i le Toeaina ia Vili o ona matua o ni fafifeau i le ekalesia Metotisi, le susuga Rev. Vili ma Sarai Iosua o Gautavai Savaii, ma na ia faaalia i le vaega o talafou le agaga faafetai i le Atua ona o ia avanoa taua ua valaauina ai i laua ma le faletua e tautua i lea vaega o le Tovine.
Sa faaiuina i se taumafataga na saunia lava e le aulotu Samoa i Campbelltown ma tatala ai loa le filialii i lea Aso Sa.
