E tusa ma le 465 le faitau aofai o alii ma tamaitai leoleo mai le malo tele o Ausetalia na auina ma ofoina mai le latou auaunaga e ala i le soosootauau mai i le matagaluega a leoleo Niu Sila e tusa ai ma mafatiaga na iai Kalaiesetete i le mafui‘e.
Ma o lenei fuainumera e pei ona faalauiloa mai e le alii taitai Superintendent Dave Cliff (Canterbury District Commander), sa auina fesuiai mai ta‘i lua vaiaso.
O le toatele o lenei au fesoasoani (calvary) e aofia ai ma le vaega faapitoa o le au laveai sa galulue lē faalogologo tiga, e ui ina e fou lo latou oo mai i laufanua o Kalaiesetete aemaise le ogaoga o afaina o mea ua faaleagaina.
O nisi foi ua galulue faasoloatoa, atonu ua taunuu ai se tasi o fetalaiga tuusa‘o a le KerisoToetu “E fai lua o alope, e fai foi moega o manufelelei ae o le atalii o le tagata e leai se mea e moe ai o ia”.
O se taimi muamua lenei i le talafaasolopito a Ausetalia ua tuufaatasia ai le auaunaga a leoleo (federal police) mai setete e valu a Ausetalia i se operation e tasi e pei ona iai le mafui‘e i Kalaiesetete, o le faatinoga lea o le alofa faauso tuofe mo le malo o Niu Sila.
O se tasi o alo o le atunuu o loo galue i Brisbane, Senior Constable Fred Veve sa maua se feiloaiga ma le tusitala, na ia ta‘ua ai lona matuā fiafia ina ua ia oo mai ma tuu mai lona tauau e fesoasoani ai e ala i soo se galuega e avatu.
O le faasoaina o galuega e amata mai lava i le leoleopo, faamamāina o fanua o aiga, saogalemu i luga o auala aemaise le fesoasoani i le au matutua, o nisi ia o le tele o tiute sa feagai ma leoleo faatasi ai ma le au faatiga ulu sa feoai solo, peitai sa lē solomuli le auaunaga ae na faaalia foi le suiga laitiiti ona e lē laeiina e Niu Sila ni tamai fana e pei o leoleo Ausetalia.
O Fred Veve sa galue muamua i Aukilani mo tausaga e tele, o le alo o Unasa Veve (Siufaga Savaii) ma lona tina o Malama (Tanugamanono).
Na faia se sauniga faapitoa e faafetaia ai le auaunaga a alii leoleo mai Ausetalia, ma saunoa ai le alii Komesina o Leoleo, Howard Broad, o le a taui atu e Niu Sila lo outou agalelei i le ofo fuaina atu o le latou foi tautua pe afai e afeaina Ausetalia i ni mafatiaga i le lumanai, ma foaiina atu i ai nai meaalofa faamanatu e tofu latou ma le suvania pounamu.
O se tasi o tamalii o le atunuu mai Ueligitone, William Fanene (National Police Pacific Adviser) sa aumau pea i Kalaiesetete mai le uluai taimi na lulu ai le mafui‘e i lana matafaioi o le fesoasoani malosi mo tagata Pasefika aemaise lava Samoa, e logopuialii ma fautuaina e ala i fesoasoani eseese mai le malo i taimi faapenei.
Sa galulue faatasi o ia ma le alii leoleo o Colin Lemalu, o se tamafanau a le atunuu i totonu o Kalaiesetete.
O nai tamalii foi nei o le atunuu ona sa tele ina feoai e tufatufa leaflets i pusameli a aiga mo le taulogologo talu ai ua faigata fesootaiga ua leai ni polokalame a leitio Samoa ona ua afaina le faleualesi faasalalau i le mafui‘e.
