O le uluai taimi lenei faato‘ā feiloai ai le Community Samoa a Kuiniselani ma le Miss Samoa Ausetalia, le tamaitai o Rebecca Rowena Sutherton e pei ona pale mai o ia i le tofi i lenei tausaga 2010-2011, ma e alaala i le aai o Niu Sa Uelese. O lenei faamoemoe sa fau ao fau po lenei ua faataunuuina ma le manuia.
O le tāua ma le aogā o lenei feiloaiga ona ua mafai ona molimauina ai e le toatele se DVD mai lava i le uluai taimi na amata faavae ai le Miss Samoa Ausetalia i totonu o Kuiniselani.
Na silafia ai foi tamaitai uma na paleina le pale i tausaga ua mavae, ma o latou tiute sa feagai ai a o tutū mai i lenei tofi o le Miss Samoa Ausetalia.
E leai se faailoga fesili o se isi na auai i lea po, ma e moni lava le upu masani e talitonu a Toma ina ua vaai.
Na matuai faalologo le aofia ae tutulai sui o le Komiti ma o latou agaga ootia e faalauiloa a latou galuegafai.
Na ta‘ua e le failautusi, le faletua ia Eseta Frost, o tiga uma ma tuuaiga na feagai ma i latou, sa o latou inu i ai ma le onosai.
O gagana lē talafeagai na tuuaia ai le latou komiti e nisi o nusipepa, o faamatalaga talafo na tuia ai o latou loto, peitai na folofolo mālie pea ae faatuatuanai le pola motu i tua, auā pe ana latou faaaogāina nei tuuaiga, poo penei e lē o mafai ona tino mai o latou tofi na totofi ma valaauina ai i latou.
O le isi mau o loo manuia ai a latou taumafaiga ona e aogā mea vaivai nei e atili lu‘i ai lo latou faatuatua ma saga tupu ai lo latou malosi e tauivi ai pea e finau ma faamalosi e pei o la le aposetolo o Paulo.
O lenei foi Komiti e lē mafai e se tagata e vaivai se loto ona saofai ai auā e inu i vai oona ae liua i se uaina suamalie manino le iuga o lea tautiga.
Na malaga faapitoa mai le ausiva mai Sini ua igoa o le Spirit of the Island e faafeao mai le Miss Samoa Ausetalia i le setete o Kuiniselani nei, ona sa lē mafai ona paau mai ona mātua ona o tuatuagia faaleaiga.
O le faafeagaiga EFKS a Logan West, le susuga ia Rev Perolini Tauilo sa taitaia le sauniga e tatalaina ai lea feiloaiga e pei ona molimauina foi i lea po, sa auai foi le faletua ia Tili Tauilo ma nisi o le ekalesia.
Sa matagofie ni saunoaga faalaeiau na saunoa i ai le Hai-Komesina o Samoa i Ausetalia, le afioga ia Lemalu Tate Simi, o ia lea o le malo faaaloalogia faapea le pulenuu a Logan City le afioga ia Pam Parker.
Na auai foi sui o mafutaga e pei o le Leo o Tagata Samoa, le peresitene, Faimalo Ioane Pale ma le faletua, failautusi ia Vaaaoao Alofipo ma le laualaufono a le Leo o Tagata Samoa, afioga ia Tauiliili ma le faletua ia Elisapeta sa fai ma sui o le leitio 4EB; faatonu o le Penina o Asuisui Fiu Tamala Malatai Fiu faapea Rev Salakaia Sekolasitika Satui, o ia o se faamasino o le tauvaga o le Miss Samoa i le tele o tausaga, ma le tele o malo faaaloalogia ma le mamalu o Samoa na molimauina le faamoemoe.
Na matagofie le po i le auai atu foi o nisi o tamaitai sa avea ma Miss Samoa Ausetalia i tausaga ua mavae.
Na manino le mata o le vai ma faamalieina finagalo o le auvalaaulia o Samoa na pa‘au atu, auā na auiliili lelei e le komiti le galuega fita o loo latou faatinoina ona o lea lava foi matafaioi, o le sailia lea o tamaitai lalelei e paleina le pale o le Miss Samoa Ausetalia i tausaga taitasi, e lē gata o le Faatonu, failautusi faapea le tala o le seleni.
Momoli ai le agaga faafetai o le afioga i le Hai-Komesina i le tapenaga faafafine to‘aga o tiutefai o le Komiti, aemaise lona agaga faafetai i le loto tetele e faataunuuina ai o latou tiutefai. Na saunoa foi le afioga ia Lemalu Tate Simi, soo se mea lelei lava e tatau foi ona faasalavei ai le tiapolo peitai, e lē mafai ona manumalo se fili.
O le tamaitai lava o Rebecca Rowena Sutherton sa fai ma fofoga o le po faatasi ma le afioga ia Toleafoa Ian Asiata mai Satupaitea, o loo galue o ia i le Centre Link. O le peresitene o le Miss Samoa ma le latou komiti o loo alaala uma i Brisbane.
O le faatamā o lea foi Komiti, o ia foi e feagai ma tulaga tau i le aganuu, o le afioga ia Taefu Patea Taefu, o le tofa a Talevu Koleta Galumalemana o ia o le Faatonu, o le Failautusi o Eseta Frost, Teutupe o Feagia‘i Lilomaiava, o le Va-i-fafo o Muliagatele Filipina Petelo, faapea le tofa ia Taliaoa Tina ma Tina Taefu o feagai ma galuega faatino e fesoasoani ai i le Komiti.
Na iu manuia le faamoemoe auā sa faamamalu aao agalelei o le Atua faapea le lato i le ea a malo faaaaloalogia, ona faaiuina ai lea i se taumafataga na saunia lava e le Komiti a le Miss Samoa Ausetalia.
