E 18 ‘au na tausinio i le taamilosaga o le Kingdom Uso i le Aso Toonai ua mavae i le malae o le Ekalesia Faapotopotoga a le Atua i Penrose. O lenei taamilosaga o le lua ai nei o tausaga talu ona faagasolo. Ma sa vaaia le toatele o ‘au ua faaopoopo i lenei tausaga nai lo le tausaga ua mavae.
E fā Pool na vaevaeina i ai ‘au taitasi, e taifā ‘au i Pool e lua a o isi Pool e lua e tailima ‘au ona ua fai si toatele o ‘au mo lenei tausaga. O le tele lava o ‘au sa auai o tupulaga talavou lava mai i totonu o Ekalesia eseese. Sa toatele foi susuga i faafeagaiga na auai e lagolago lenei faamoemoe.
Na amata i le sauniga lotu na taitaia e le susuga ia Rev Rolani Mika mai le Ekalesia Faapotopotoga a Iesu Samoa, ma na saunoa faamalosi ai foi le susuga i le taitai i le tāua o lenei taaloga o le lakapi i tupulaga talavou.
E ese mai le faagasoloina o lenei taamilosaga mai i isi taaloga lakapi o loo faatinoina i totonu o le atunuu. O le manulauti ma le faamoemoe o taaloga nei, o le faamasani ma le mafuta faatasi ai o tupulaga talavou. Ma e iai foi ona tulafono, e sa le fusu ma le palauvale, se‘i tulou le faitau a le atunuu.
O le Pool A na iai le ‘au a le Sons of The King, Kingdom Uso, O.F.T. Rooster, Papatoetoe AOG, ma le Word of Life South Auckland B. O le Pool B o le Papakura Worship Centre, O.F.T. Wolves, The Extenders ma le Samoa New Testament. O le Pool C o le Word of Life Auckland A, GIM Runners, Tama o le Papasosolo, Samoa Christian Church ma le Rocks. O le Pool D o le Seaside, Weymouth Angles, Word of Life Henderson ma le Rivers of Life Otara.
Sa lē faigofie le faagasoloina o taaloga o Pool taitasi ona e tutusa uma le malolosi o ‘au sa auai. O le ‘au a le Sons of The King ma le Papatoetoe Youth AOG na sao mai le Pool A, o le Samoa New Testament ma le Seaside mai le Pool B, a o le Rocks ma le Word of Life Auckland A na manumalo mai le Pool C, ma le Rivers of Life ma le OFT Wolves na suipi mai i le Pool D.
Na mae‘a le faagasoloina o le quarter final ma see mai ‘au e fā mo le sueina o le Semi Final, lea sa taalo ai loa le Papatoetoe AOG Youth ma le Sons of The Kings, a o le Word of Life ma le Seaside.
Sa fai si faigata o nei taaloga ona e uma le taimi o tutusa ai o le taaloga ma toe faaopoopo ai isi minute ma manumalo ai loa Sons of The King ma le Seaside i le sueina o le ipu autu. Na muliga foi le tapuaiga o le suega siamupini a le 4 Nations ua mae‘a atu i le tumutumu o autafa o le malae i mātua ma le tapuaiga a Ekalesia i le mataina o le sueina o le ‘au o le a sola ma le ipu ma le teutusi e $200.00, e tiga lava ona malosi le agi o le savili ma le timu ae sa lē tuua ai lava le finau o ‘au e lua, ma mae‘a ai le taaloga ua toe suipi le Sons of The King i lenei tausaga 2014.
Na faaauau le tufaina o faailoga i totonu o le hall a le Ekalesia AOG i Penrose, mo ‘au ua lautogia i le taamilosaga. Ma o susuga i faafeagaiga ia Matafala Lesa, Rolani Mika, Faapaia Tuigamala sa tufatufaina faailoga.
O ‘au e fā pito i luga o lenei taamilosaga 2014, ua toe siamupini ai le Sons of The King, (2) Seaside (3) Papatoetoe AOG Youth ma le tulaga (4) o le Word of Life Auckland A. Na faaiu le laugatogi i le faafetai a susuga i faafeagaiga mo ‘au taitasi sa auai aemaise o le tapuaiga a mātua ma Ekalesia eseese sa molimauina lenei faagatama.
O le susuga i le alii aoao ia Nuualuga Uale sa fai ma sui o le autalavou a Penrose e molimoli nai meaalofa faatauvaa mo susuga i faafeagaiga, ma faaiu ai loa i le tatalo na saunia e Pastor Faapaia Tuigamala. O le autalavou ma le Ekalesia AOG a Penrose o loo latou fuafuaina lenei taamilosaga i tausaga taitasi, ma ua iai foi le faamoemoe i le tausaga fou e toe faaauauina ai nei taaloga.
