Ua latalata ina faamae‘a galuega o le tausaga, ma o le vaitaimi foi lenei o le seleselega, e tele ina faia ai faauuga o nisi o kolisi i le poto salalau, ae faapea foi ma le aoaoina i le Afioga Paia a le Atua. O le taimi foi lea e masani ona faalogo ai le auaooga i le autapuai, o faapea, ‘O le fua lava e te lulu e te toe selesele.’
O loimata o le fiafia, e filogia ai ma foliga aulelei o le tamā ma le loomatua ua alu le tausaga o tu‘i le mulipapaga pe tua ma ni ā le tausinioga a fanau, o le aso foi lea ua galo uma ai tiga ma le faigata a o le tele o tupe na faaalu auā ua tini lau o le faamoemoe, ma ua faaeaina ai le pologa o mātua aemaise o aiga.
O foliga ia o le Aso Toonai ua mavae, 22 o Novema i le Town Hall i Papatoetoe i mātua ma aiga aemaise o susuga i faafeagaiga sa molimauina le tufatufaina o tusipasi o i latou ua faamanuiaina lo latou taumafai i le aoga a le Auckland Pacific Bible College i Papatoetoe. E 11 le aufaauu e aofia uma ai tamā ma tina aemaise o nisi o tupulaga talavou sa aoaoina i lenei Kolisi.
Na amata le polokalame i le savali e molimoli atu ai le aufaauu ma faiaoga i totonu o le fale, ma saunoa ai loa le susuga i le alii puleaoga ia Tala Burgess e faafeiloai le mamalu o le auvalaaulia aemaise o aiga ma uo na faatasi atu e molimau lenei sauniga faapitoa.
Sa faapea foi ona auai mai ai le pule o le aoga Tusi Paia i Ueligitone le faletua ia Eseta Ioane-Roach, o le faiaoga ma o ia foi o le loia le susuga ia Peter McKenzie faatasi ai ma le faatonu o le galuega o le Autalavou mo Keriso i Samoa (YFC) le susuga ia Manasa Aloalii.
Na sosoo ma le viiga e ave ai le taulaga faafetai i le Atua ona ua faaeaina le taumafai o nisi sa aotauina i lenei tausaga ae ua faamae‘a ai foi ma galuega ma aoaoga sa fitaituga i ai faiaoga ma le komiti faafoe.
O le susuga i le faafeagaiga ia Enele Fua Leaututu o le Ekalesia Emanuelu i Te Atatu Penisula na fofogaina le tatalo e faamae‘a ai le viiga, a o le susuga i le faafeagaiga ia Tanuvasa Eric Toomata o le Ekalesia Emanuelu i Manukau na taitaia le aoina o le taulaga.
O le manavaina o le upu folafola a le Atua na fofogaina e le faletua ia Eseta Ioane-Roach. E tele se ‘oa o le afioga a le Atua na faasoa i ai lana auauna ma na avea o se luitau ma se toe faamanatu i le aufaauu aemaise o le auvalaaulia, na afea i lea faamalosi se mau e faapea “Ia faamuamua Iesu i o tatou olaga.”
O le tolaulauina o suafa o le aufaauu na fofogaina lea e le susuga i le faafeagaiga ia Rev Mika Lagavale ma o ia foi o se tasi o faiaoga i totonu o lenei kolisi, ae o le tauaaoina o tusipasi na galulue faatasi i ai le susuga i le pule aoga mai Ueligitone le faletua ia Eseta Ioane-Roach ma le alii loia ia QC Peter McKenzie.
O i latou sa faauu: Tilianamua Aloalii, Misa Kolose Lagavale, Peata Lagavale, Eni Leiataua, Logonaitana Leiataua, Mareta Tapuai, Tusiesea Tuiloma, Tusitina Tuiloma, Nuualuga Uale ma Eteuati Tamala.
E 2 tausaga na tauivi ma finau ai i latou nei ma o le tausaga fou o le a faaauauina ai pea lo latou taumafai i nisi o mataupu o loo aoaoina i totonu o lenei aoga.
O le faletua ia Tilianamua Aloalii ma Peata Lagavale ua la mauaina le ipu o le tamaitiiti aoga o lenei tausaga.
E uigaese foi le mālie o se tasi o loomatua sa auai, ua na o le juzuzu ma osooso ma valaau, “Faafetai Iesu, Faafetai Iesu i lou alofa,” e faaalia ai lona fiafia i le taumafai o se tasi o lana fanau.
O le sini autu poo le manulauti o lenei Kolisi, “Ia iloa o Ia (Iesu) ma faailoa atu.” Na tapuni aloaia lea sauniga mamalu i le tatalo na saunia e le faafeagaiga ia Rev Mika Lagavale.
