O fanau o le ‘anofale i totonu o aiga, o i latou foi o le tofi mai le Atua ma ua faatusa foi i ūfanafana i le lima o le toa, o le unai o fanau e o i le aoga Aso Sa o nisi ia o matafaioi a mātua, ae o faiva alofilima foi ia o faiaoga Aso Sa ma le faifeau e faafoeina, auā le ola faaleagaga o fanau i lo latou tutupu a‘e.
E pei ona masani ai le Koneferenisi aoao a le Metotisi i ana suega faaletausaga lea e faia i le masina o Me, i totonu o aoga Aso Sa i matagaluega ma sinoti taitasi, ma tuuina atu pepa e togi e le matagaluega o aoaoga Kerisiano i Samoa, ma toe faafoi mai iuga o suega i le masina o Aukuso.
O nei suega tāua ua laugatasia uma ai le Ekalesia aoao ma e amata mai i le vasega laiti seia oo i le vasega sefulu (10), o le maualuga lea ma ua ta‘ua foi o le vasega faaiuaso e taualuga i ai le olaga aoaoina faale aoga Aso Sa o le fanau.
O le tuufaatasiga o togi o le Vasega 10 mai aulotu taitasi i totonu o le latou lava sinoti, o ai le tamaititi e sili ona maka, o ia lea na te maua le ipu o le manumalo i le sinoti atoa.
O le Aso Sa, 29 Aukuso na faataunuuina ai le laugatogi a le matagaluega o Kalaiesetete i lalo o le taitaiga a le tausi matagaluega, Rev Ale Palelei, ma o lenei aoga Aso Sa o loo i le faasinoti a Niu Sila i Saute lea e amata mai i Ueligitone seia oo i Invercargill.
E toaono fanau sa sue ai i le vasega lea ma sa faamanuiaina uma le toalima i tusipasi auro ma le tusipasi siliva e tasi, ae o le mitamitaga sili faaleagaga, ua toe manumalo ai Kalaiesetete i le ipu o le Vasega 10, ina ua sili aoao le alii o James Ale i le tuufaatasiga atoa i totonu o le sinoti a Niu Sila i Saute lea o loo taitaia e le susuga i le alii sea, Rev Savaii Loto i Hataitai.
O le faatolu ai lea ona maua e Kalaiesetete le ipu mai tausaga e fa sa amatalia ai lenei faamoemoe, e na o le laumua o Ueligitone na latou mauaina i le tasi tausaga, ma e sili ai loa ona faasima i le aai o fugalaau matala le ipu ma le feaveai solo.
E momoli le faamalo ma le faafetai i alo ma fanau uma a le sinoti aemaise le Koneferenisi aoao i le ola tauivi aemaise foi o faiaoga Aso Sa ma le aufaigaluega e tusa ma o outou faiva alofilima e faufau ma mamanu fanau.
