(….. Ae see mālie ane Sonny B Williams i lana uluai taaloga…)
Ua alu taumalualua le vaa, ua tatau ona faatutu foe o le savili, atonu o lagona ia na oo i le alii faatonutonu folau, poo le alii faiaoga o le au lakapi a Aukilani, Mark Anscombe, lea na ia tautino ai i lana autaalo ia mataalia e matuā faamau fusipa‘u i sulugatiti ma ia unai mai loto ia tinou e taalo faatasi e pei o se tino e tasi, ae lē o le alu lava o le tagata ia e fai lona paoa, ina ua faiaina mai le la taaloga ma Canterbury i le taamilosaga o le ITM Cup i Kalaiesetete i le 35-16.
E tusa ma le 14,500 tagata sa maimoaina lenei taaloga i le afiafi o le Aso Toonai i le AMI stadium, e foliga mai Aukilani e lei lava tapena, na maitauina le mae‘a ai o le 12 minute ua tulai mai le sikoa i le 15-0 ma e uma ane le ‘afa muamua o loo faasee mai pea i tuagalu i le 18-6.
O le lua ai lea o faiaina sosoo a le aai o folauga, o se faatiga loto pe a vaavaai i ai i sikoa e pei ona faaleoina mai e le alii faiaoga o Anscombe, ma ia ta‘ua ai le matautia o le game plan a Canterbury mai le vaiaso talu ai lea na faiaina ai ia Tasman.
I se faatalanoaga i le mae‘a ai o le taaloga i Kalaiesetete, na faaalia le taufai tutu faatasi o le toasefululima a Canty ia latou tapenaga, o le aupega malosi foi lea aemaise taimi e maua ai le polo ma faapena ona tinou faatasi e unai i taimi o sikalamu.
Tulai mai le iuga o le taaloga i le fa sikoa a Canty, ae faafetai i le sikoa a Onosai Auvaa i nai minute mulimuli ae o le a uma le taaloga, lea na kiki ma ova ma uma ai ma le taimi.
Ua lona fa nei Canterbury i le faasologa ina ua latou maua ‘ai e 18, ae o loo muamua pea Southland i le taimi nei.
O le afiafi lava lea sa lolofi ane tagata e fia maimoa i le uluai taalo a Sonny Bill Williams i le Canterbury Metro, (curtain raiser) sa faafiafiaina i ana sikoa e lua i le 40 minute na iai i luga o le malae.
Na faatalanoa e sui o le Samoa Times faatasi ma isi tusitala Sonny ma ia faailoa mai ua ia lava sauni mo le au tele, ae taatia pea i alii faiaoga mo le vaiaso fou atonu lava e maua sona avanoa i le taaloga ma Bay of Plenty i le Aso Faraile.
Sa fesiligia foi lona auai ai e faasee i luga o le mauga aisa e pei ona iai le mau uaealesi eseese, tasi lava lana tali i le au tusitala
“E fia talanoa i mataupu tau lakapi”.
