O le taimi lenei ona pau le aofai o tagatānuu o Samoa ua faamauina i Samoa nei le maua i le gasegase o le fatafata vaivai poo le mamapala (tuberculosis – TB) e to‘a 19.
O le numera lea o i latou ua oo mai ma ua siaki i le falemai ae o lea e iai le masalosaloga malosi o le Matagaluega o le Soifua Maloloina e toatele atu nisi ua maua i lea gasegase pipisi ae o loo matamuli e agai e siaki i latou.
Faaalia e le Minisita o le Soifua Maloloina, le afioga Tuitama Dr Talalelei Tuitama i se sauniga e faamanatu ai e aso faavaomalo ua taulai i faalauiloa o lenei gasegase, e tatau lava i le atunuu ua umi tele ona tale ae lē alu ese lea gasegase, ona vave siaki se fomai lata ane ona o le toatele e ala ona aafia i le fatafata vaivai o le nofoai ae ua lē vaai vave se fomai ma ua ogaoga le aafiaga o le fatafata lea e mafua ai le tale umi ma le tale soo.
O gasegase e pei o le lepela ma le fatafata vaivai faapea le mūmū tutupa o nisi nei o gasegase na ta‘ua lava e le lala o le Soifua Maloloina a le Lalolagi, le WHO ua leva ona tatau ona tafiesea mai le lalolagi i lenei vaitaimi peitai o lea ua vaaia le toe pepesi, ma o le popolega tele lava lea o le fatafata vaivai ona e pepesi ma o totonu o aiga o i latou ua aafia e ono afaina i lenei faama‘i.
O le kolisi o Maluafou lea na faatautaia ai le polokalame o le faamanatu ai faavaomalo o lenei gasegase. Faaalia e le alii Minisita, e tāua le maua uma o faamatalaga ma le malamalama o le atunuu aemaise le fanau laiti i lenei gasegase.
O le TB ua tele ina fesootai ia i latou e ulaula tapaa ma i latou o loo mānavaina le asu o le sikaleti i taimi uma. O le manatu o le Minisita ai lava se toatele o loo maua i le gasegase ae e lē o agai atu lava seiloga ua aafia ma ua siaki i taimi e tausavali atu ai ona faatoa iloa lea.
O le unai a le Matagaluega ina ia faamuamua auala e taofia ai lenei gasegase ae aua le faatali se‘i tau togafitia ma o le mafuaaga lea ua valaauauina ai le atunuu ina ia tutu faatasi e fai se suiga ma ia matuā tafiesea lava le fatafata vaivai mai i le toe vaaia i totonu o Samoa.
