E lē avea faaletonu i se vaega toaitiiti o pagota e aveesea ai le tāua o polokalame o loo faia i tausaga uma ua faatino ai e le au nofosala tala o le Eseta, tala o le Kerisimasi, ma le aso o tu ma aganuu.
O polokalame nei na amata faatino a o pulea falepuipui i le atunuu e le Matagaluega o Leoleo, ma ua faaauau pea e le Pulega fou ua latou vaaia ma faagaioia nei le pulea o falepuipui i Vaiaata i Savaii, faapea Olomanu ma Tafaigata i Upolu. O le vaiaso ua mavae atu nei a o lumanai le faamanatuina o le Aso Maliu poo le Eseta, sa faatino ai e se vaega toatele o pagota mai falepuipui e tolu i le atunuu le polokalame o le Eseta.
O se taumafaiga na molimauina e le afioga i le faamasino o le faamasinoga maualuga Vui Clarence Nelson, o le Minisita o Leoleo ma Falepuipui ma Tineimu le afioga Sala Fata Pinati, faapea le Minisita o Faamasinoga ma Pulega Tau Faamasinoga, Faaolesa Katopau Ainuu, ma le Minisita o Tina ma Tamaitai Atinae o Nuu ma Afioaga ma Aga Fesootai, Faimalotoa Kika Iemaima Stowers. Sa faatasi ai foi le Minisita lagolago o le Matagaluega o Punaoa Faalenatura ma Siosiomaga le afioga Taefu Lemi.
“Talu ona faatino polokalame nei ua molimauina suiga i amio ma le olaga o pagota i totonu o le nofoaga”.Se isi vaega o le tala faatino a alii pagota o TafaigataO le finagalo lea o le Sui Komesina o Falepuipui le afioga Sagaga Galu Frost ina ua fesiligia. “O le sini lava ma le autu ia maua e pagota se isi avanoa e toe fuataina ai o latou olaga e ala i polokalame faapenei auā o tausaga ua mavae sa lē faia ni polokalame faapea, ae o le tele lava o taimi o le tuli o faasalaga i le nonofo i potu ma tatala mai i fafo e fai galuega ma le aso o taaloga”. O le faatinoina o tala o le Eseta faapea pesepesega faaleagaga na maoa‘e tapenaga a le au nofosala mai Vaiaata, o Olomanu ma Tafaigata. O le faatinoga o tala ma le faia o teuga aemaise o le faatinoga o le tala e pei lava o tagata o loo autu mai i ai ata tifaga.
O se tasi lea o vaega tāua sa togi i ai le polokalame e faamasino na filifilia. “E maeu lava foi le sogasogā o nai o tatou uso ma tuafāfine o tamā ma tina ua oo ai i le nofoaga ona o le faatinoga o tala ma pese, ma o la‘u molimau o lea ua toe faafoi o latou olaga i le taimi o laiti pe a oo i aso o le Lotu a Tamaiti e masani ona faia ai tala nei o le Tusi Paia”, o le finagalo lea o se tasi o faamasino o le polokalame. “O le tatalo ia talosia e musumusuina ai pea o latou loto e fai se aogā o le faasalaga e lē toe oo atu ai i le agasala”.
O le afioga i le Minisita o Leoleo ma Falepuipui ma lona faletua na faatupeina faailoga faapea le vaega o taumafa ma vaiinu sa tali ai le toatele o aiga ma uo faapea le auvalaaulia. Na maua e le tusitala se molimau e faapea o le manao lea sa fulisia i ai pagota uma i falepuipui ia toe tofia le afioga Sala Fata Pinati e avea ma minisita o leoleo ma falepuipui ona o le latou molimau o se tamalii e tumu i le alofa ia i latou.
O lea lava la ua tali o latou manaoga ua toe faaauau le tofi minisita o ia matagaluega tāua a le Malo e le faipule o Gagaemauga Numera Tasi.
