E ui lava i le susua o faamatalaga i le mananaia o tala o le faatasiga o le fonotele a le Ekalesia aoao AOG Church of Samoa in Australia na usuia i Niu Sa Uelese i le masina o Mati, peitai fai mai le upu, “E talitonu lava Toma ina ua vaai.”
Na tapuaia lava ma tu‘i le mulipapaga e nisi o sui o ekalesia na faamuli atu, lea na to‘ai taunuu manuia mai i fanua auā sa toesea lava ā nuu potopoto, faafoi lava le viiga i le Tolutasi Paia ona o Lona aao taitai i le latō i le ea ma le latō i le ala. Na faafiafiaina le au tapuai na lē auai ma mafuta atu aemaise nisi mai isi tapuaiga na auai ina ua toe faatinoina i le Aso Sa ua tuanai. O le tele o vaega uma e ala i pesega ma tala faaleagaga na fai sao ai ekalesia a le Pulega a Kuiniselani na auina atu i le fonotaga aoao a le ekalesia, e le gata i lea na toe maimoaina ai le lalelei o togiga matagofie ua atili aulelei ai tagata uma.
O polokalame o le Aso Sa ua tuanai, o le Taitai o le sauniga o le aao tusitusi o le pulega a Kuiniselani Ps Peteru Pou‘oa Polai ae o le upu faalaeiau sa folafolaina e le taitai aoao a Ausetalia le susuga ia Pastor Tae‘auga Ropati Frost, sa fai ma upu faalaeiau o le faatasiga a le faleono.
O le taimi o le talisuaga sa faaleoina lava vaega uma e le Fofoga o le ekalesia le susuga ia Ps Peteru Pou‘oa Peteru ae avea le tootoo o Salemuliaga le tofa ia Faletua‘i Tafi Faletua‘i e faafetaia le ekalesia ma le aumalaga i tapenaga matagofie. O le tofa ia Tupuola na talifuaitau i le vāgana logomālie.
Na momoli foi le agaga faafetai mai le susuga i le toeaina ia Pastor Lega i le tapuaiga. E le gata i lea o le agaga faafetai i le Atua ona ua toe pale mai le taitai aoao i lona tofi, le susuga ia Pastor Tae‘auga Ropati Frost (Taitai aoao o le ekalesia Church of Samoa i Ausetalia) o loo avea foi ma taitai o Kuiniselani ae o se faafeagaiga o le ekalesia AOG a Inala.
E lelei lava le Atua i taimi uma. O le naunautaiga o ana auauna ia mauaa le faatuatua o tagata lotu e vivii ai i le Atua i le loto atoa, tino atoa, agaga atoa ma le manatu atoa ma le faamaoni ina ia tini lau ma maua se ‘ai mo le lagi ma le ola e faavavau.
