O le Sulufaga o Iesu le agalofa mamana (Divine Mercy) o se aso faapitoa mo i latou uma e auai i le Divine Mercy e pei ona faamamaluina i le Aso Sa ua tuanai i le mae‘a ai o le Eseta, e lē gata o Divine Mercy iinei ae faapena foi isi Divine Mercy i le lalolagi atoa. O lenei la sulufaga e faamamaluina i tausaga uma.
O le Afioga lava ia Patele Epati Tamati sa taitaia le sauniga ae lagolagosua i ai le susuga i le tiakogo malaga mai Samoa le susuga ia Ioane Pulou Tauiliili (Amaile Aleipata).
O le Palisi a Jindalee sa faia ai le faamoemoe o lenei tausaga a le faleono. O le tofa ia Malaeulu Aukuso Toleafoa o le taitai lea a le Divine Mercy a Jindalee sa faafeiloaia le mamalu ma le paia o le nuu o le Atua aemaise le taitai o le sauniga.
O le tofa ia Motuopuaa sa fai ma fofoga o le aso, o ia foi sa fai ma fofoga o le faleono e momoli le faafetai i le afioga ia Patele Epati Tamati mo le galuega mae‘ae‘a, aemaise le upu folafola. O se taumafa manogi lava le upu a le Atua na laugaina, o se fugalaau na sasala atu ma faamalieina ai le galala i le fia taumamafa i Afioga paia a le Atua e tomatau ai le ola faatuatua o le nuu o le Atua.
O le tofa ia Malaesala mai le matagaluega a North Side sa fai ma sui o le valaaulia e tali fuaitau e tusa ma le aso. O faaaloaloga e masani ai aso faapenei, o le isi lea vaega mataina o le aso ma le tele o taumafa na teuteuina le itu faaletino ina ua mae‘a le osiga o le taulaga paia o le Misasā.
Sa faafetaia foi le paia ma le mamalu o le toatele sa auai, o le tasi lea o vaega tāua e tele ina feiloai ai tagata lotu pe a faamanatu ni aso faapitoa faapenei a le ekalesia Katoliko.
