Oka oka se fiafia o le pulega ma le Iuni lakapi a Fiti ina ua faaeaina i le la taaloga ma le Atu Kuki i taaloga e saili ai le ‘au e ofi atu i le taamilosaga o le Ipu o le lalolagi, ua pei ai lava o se polokalame ua leva ona fuafuaina ina ua tutupu fautasi uma ia mea i le taimi e tasi, ina ua taunuu le faaevaga o le Ipu o le lalolagi i Fiti, faatasi ai ma le faaeaina i le la taaloga ma le Atu Kuki i le 108 Fiti i le 6 a le Atu Kuki.
Sa faataunuuina lea taaloga i Lautoka i Fiti, na lei mafai e le ‘au ma le Atu Kuki ona faafetoaia le malolosi o osofaiga a Fiti, ua atili faaopoopoina le malolosi o le ‘au a Fiti i le toatele o le tapuaiga i Lautoka, sefulu ma le fitu sikoa na maua e Fiti i lea taaloga o isi ia foliga vaaia o le lava saunia o Fiti i lea taaloga.
I le taimi nei ua ofi atu ai Fiti i le taamilosaga o le Ipu o le lalolagi i Egelani e feiloai ai ma Ausetalia faapea Wales ma Egelani i le Pool A, ma e ono foliga mai e ono talamaea Fiti ma Egelani i le uluai taaloga o le Ipu o le lalolagi i le aso 18 o Setema i le malae faavaomalo i Twickenham i Egelani.
O se taaloga mataina tele i le ‘afa muamua o le taaloga, aemaise ai le alii fulupeki a Fiti le alii o Metuisela Talibula i le uluai sikoa, ae e lei nofoai ai le finau mai pea o le ‘au mai i le Atu Kuki.
Na vaaia foi i lea taaloga le matagofie o le tulai mai o nisi o le ‘au mai le Atu Kuki, e pei o le alii o Kima Iosua, Nick Connal, ma Steve Stephano, masalo o le a lē toe malolo ai foi Fiti i le tapenapenaga mo le Ipu o le lalolagi e faafetoaia ai Wales, Ausetalia , faapea Egelani.
Ma e lē o ni ‘au faatauvaa foi ia ‘au i le taimi o le Ipu o le lalolagi, ae tatou talitalia pea taumafaiga a Fiti latou i so latou foi sao i le taamilosaga.
