Ua toe nei o se aga le faamoemoe o taaloga a le Taupulega le Commonwealth Games ia Oketopa, peitai o le au Taitoafitu a Samoa lea o loo taoto ai se faamoemoega tele lava ina ia maua ai se Pine mo le atunuu i ia Taaloga, talu ona tulaga manuia lana ‘au i le Taamilosaga a le IRB.
E lē o toe po se lilo i le faafofogaaga a le atunuu le tulaga taape ai o le ‘au a le atunuu ina ua mae‘a lea taamilosaga a le IRB, e lē gata i le maua o ni Konekarate e taaalo ai i nisi atunuu, a o le tuatuagia lava i faalavelave faaleaiga, ma o se tala faanoanoa lea i le tapuaiga a le atunuu ona ua matuā faatuatuaina tele nei alo o Samoa i le lelei o a latou taaalo.
O le susuga a Mikaele Pesamino le isi na lavea ai i le lisi lea ua maua lana ‘au e taalo ai i le Kalapu a Sales Sharks a Peretania, ae o ia foi o le Tama Taalo o le taamilosaga Taitoafitu na mae‘a atu nei, na pei lava foi ua uma le faamoemoe o le toatele i tapenaga a le Commonwealth ina ua faalogoina lea tala.
Peitai o se tala fiafia na lipotia mai i Samoa i le faaiuga o le vaiaso ina ua toe maua le tala i le toe foi atu o le alii saoasaoa o Pesamino i Samoa, ma ua toe faailoa lona fia auai atu i le togalauapiga o tapenaga mo ia Taaloga.
E lei iloa mai lava Konekarate i Peretania lea na saini, poo le ā le mafuaaga ua toe malaga faatopetope ai le alii i Samoa ae lei iai sana taaloga i lana Kalapu. Na pau ni tala feaveai a le matagi o loo ta‘ua ai le suia o le Coach a lea Kalapu i Peretania, lea foi ua lē toe maua ai se avanoa o le susuga i le alii Kapeteni o le Manu Samoa ia Mahonri Schwalger sa taalo ai foi i lea Kalapu, lea ua agai mai e taalo ia Taranaki i le Taamilosaga a le ITM o loo faagasolo nei.
A o nisi o sui o le Taitoafitu sa iai le masaloga e ono suia Pesamino ina ua alu ese, o le alii o Timoteo Iosua ma le alii o Fautua Oto, lea ua leai nei ni o la avanoa mo ia Taaloga.
O Timoteo lea ua i Niu Sila nei i lana manamea, na molimauina foi le taalo ai i le au a Vaiala i le Aukilani Samoa i le Aso Toonai, a o le alii o Fautua o loo i Ueligitone i le taimi nei, ma sa aumai i ai le aveai e tatau ona oo atu i Samoa i le faaiuga o le vaiaso mo final trials a le au, peitai e lei oo atu, ma ua lusi ai lona avanoa.
O lona uiga la ua leai Timoteo, leai Fautua, ae ua toe foi atu nei le fili o le toatele o atunuu i le au a Samoa, Mikaele Pesamino. Ia ae aogā foi le leai o nisi o alii, e maua ai le avanoa e finau ai nisi foi alo talavou e fiafia i le Lakapi.
