E faafeiloai atu lava le mamalu e ulufale atu i le Ofisa fou o Pepa Fanau, Pepa Maliu ma Pepa Faaipoipo i le patia patā mai o masini lomitusi talu ai le matuā faaleagaina atoa o computers sa faaaogā mo le silia i le 10 tausaga e le Ofisa.
O le lala lenei o le Matagaluega o Faamaumauga na matuā malaga lelei mai nisi e iai tomai faapitoa i auala faatekonolosi faaonaponei mai i Ausetalia e faatino se galuega tele, na mafai ai ona aoina, faaputu ma lomia soo se faamaumauga tau aso fanau, maliu ma faaipoipoga e ala lea i masini computers.
O le mae‘a o lea galuega na tuuitiitia ai ma le taufai laina o le toatele i totonu ma fafo o le ofisa lenei i aso uma.
Peitai o le vaiaso na tea nei na pe atoa ai lava ma masini nei ma ua lē mafai ai loa ona toe maua ni faamaumauga tāua faapea pe a talosagaina.
Ona pau le auala o loo ua tali atu ai le Matagaluega, o le toe foi lea i masini lomitusi (typewriters) auā le faamaumau ai o suafa ma isi faamaumauga mo i latou ua vave moomia ia faamaumauga poo pepa faamaonia.
Faaalia e le Alii Ofisa Sili Lagolago o le Vaega lenei o Pepa Fanau, Faaipoipoga ma Maliu, le afioga Levaopolo Patisela Eteuati, o loo ua logo atu le ofisa e toe maua uma lava faamaumauga ae o loo moomia le toe faaola atoa o fesootaiga nei tau computers na mafai ai ona maua faamaumauga na teu i ai.
“Ona pau le tulaga o loo faafetai ai Levaopolo ona o loo mafai lava e lana aufaigaluega ona toe foi i masini lolomi auā le tali atu ai i manaoga i aso uma o Pepa Fanau, Pepa Maliu ma Pepa Faaipoipo o loo fia vave maua, ma e ui ua toe foi atoa i tausaga e tele ua mavae lenei ituaiga galuega ae o loo mafai lava e le aufaigaluega ona tali atu i le manaomia ai e le atunuu o ia faamaumauga.
O le popolega o le alii ofisa sili lagolago, ne‘i mea ane ua leiloa atoa lea vaega o faamaumauga, o lona uiga na ta‘ua e Levaopolo, e telē se galuega o le a toe faatino auā le faamauina o suafa nei.
Na ta‘ua foi e Levaopolo e oo atu i le 6000 suafa o loo lesitala ma faamauina e ala i pepa fanau, maliu ma faaipoipoga i tausaga taitasi, ma e lē faigofie le toe aofai uma o nei faamaumauga pe afai ua leaga lava nei masini.
O le vaiaso lenei lea ua malaga mai ai i Niu Sila sui o le Ofisa lenei auā le saili fofo ai mo masini computers ia ua faaleagaina.
