E leai se isi lagona ua oo ifo i le tamaitai o Efo Moalele ina ua aumai le faaiuga a le Faamasinoga Maualuga ua faapafala se faaiuga e aunoa ma le faamaonia o sona moliaga faasolitulafono (discharge without a conviction).
“Ou te faafetai lava i nai o‘u mātua ma lo‘u aiga uma i talosaga ma le latou tapuaiga a o feagai a‘u ma le mataupu i o‘u moliaga”. Sa talanoa ma le tamaitai o Efo i le telefoni ona o le fia maua o sana faamatalaga e tusa ai o le faaiuga a le faamasinoga. “Ua uma ona ma feiloai ma le Komesina ma ua faamautu ai lo‘u toe foi i la‘u galuega’.
E lē o iloa le aso e toe taliu ai o ia i ona tiute faaleoleo, ae o loo faamoemoe o le a auai o ia i le tiute faapitoa mo le Kerisimasi ma le Tausaga Fou.
E lei manuia taumafaiga i se finagalo o le alii Komesina o le Matagaluega o leoleo ma falepuipui le afioga Lilomaiava Fou Taioalo, ae ua faailoa e le tamaitai leoleo o le la feiloaiga ina ua mae‘a ona lau le faaiuga a le faamasinoga, sa avatu ai le faamalo a le Komesina ia te ia i le lava o le onosai a o feagai ai ma suesuega o tuuaiga seia oo ina faia moliaga, ma talia ai galuega a le faamasinoga.
“E faafetai lava i le Atua i le tali ua aumai o lo‘u moliaga, auā e ui lava ina sa molia a‘u i le faaoolima, ae o loo tumau la‘u mau ou te lei faaoolima ia Faasalafa. O lea lava la ua aumai le tali o la‘u mau, ma ua ou fiafia o le a toe faaauau la‘u tautua”.
O se feiloaiga a tusitala ma le sui sooupu o le matagaluega, le afioga i le Komesina lagolago, Leaupepe Fatu Pula, sa fesiligia ai i sona finagalo pe toe foi atu le tamaitai leoleo e faaauau lana tautua.
“O le tali o le mataupu lena e maua i le komesina, ma ana o a‘u ua ou avatu se faamatalaga”.
Sa molia faatasi Efo ma le tamaitai leoleo o Ferila Papalii i moliaga o le faaoolima, le faaoo manu‘a tuga, ma le faia o se faaoo manu‘a.
Peitai na soloia moliaga o le faia o se faaoo manu‘a ma le faaoo manu‘a tuga faasaga i le tamaitai leoleo satini, ina ua lē faamalieina le faamasinoga i molimau na tuuina atu, seia vaganā le moliaga o le faaoolima.
Peitai na manino i le faaiuga a le faamasino sili, e fai lava si māmā o le faaoolima na faia e Efo lea na ta‘ua i molimau o tumutumu o tamaimai lima o Faasalafa na ia tāina i se laau ua faatusaina i se ‘au o se sipuni lapoa e asu ai mea taumafa.
O le mamafa atoa o le solitulafono na faia ia Faasalafa ua faamaonia na faia e Ferila lea ua nofosala ai i le falepuipui mo le tausaga atoa.
