O loo faaauau ona faagasolo faamanatuga o aso e 16 e tetee atu ai i sauaga, ma o Samoa le isi atunuu ua silia i le lima tausaga o faamanatu ai lenei vaiaso ma aso e lua i tausaga taitasi.
O ni aso la e mautinoa le tele o polokalame e faatautaia ai, e pei foi ona vaaia i le vaiaso ua tea lea ua faaauau mai i le vaiaso lenei.
O a’oa’oga o le self-defence (tali atu i osofaiga) atoa ai ma a’oa’oga o le faalautele ai o le malamalama i nei sauaga, ma mafuaaga o le tulai mai pea, ua alu ai le vaiaso na tea nei o faagasolo.
O se faatalatalanoaga na faaali ai finagalo o le toatele o sui o matagaluega a le Malo ma faalapotopotoga tumaoti sa faatautaia i le Iunivesite Aoao o Samoa, na laga ai le tele o faafitauli nei ma le tulaga faigata o loo feagai pea ma le toatele o tamaitai o Samoa.
O le faasoa a le toatele o tina na manino ai ua malamalama tagata i le tulafono ua matuā faamalosia ai le puipuiga o tina ma tamaitai, peitai e lē o taofia ai le tulai mai pea o sauaga, ma ua iai lava tina ua uma ai soifua ona o nei sauaga faasaga ia i latou.
E telē le sao o le ava malosi, telē le sao o le manatu maualalo i tamaitai, le lē lava o le faasoa ma le isi manatu ua faaalia e sui o le Komiti Tumamā, e malosi lava foi le lē faamaoni o le alofa.
O nisi nei o le mau auala e tulai mai ai pea sauaga faasaga i tamaitai i totonu o aiga.
O le tausaga lava lenei ua oo atu i le 469 le numera o mataupu e faatatau i sauaga ua faamauina e le vaega o le saogalemu o aiga a le Matagaluega o Leoleo. O le mau a Leoleo, ua silia i le 50 numera o tagi ua faaopoopo i le tausaga lenei pe a fua atu i le tausaga ua tea. Ua aofia ai ma mataupu ua maliliu ai lava tina o aiga.
O se tulaga e faapopoleina ai faalapotopotoga nei o loo nafa ma le tali atu i faafitauli faapenei e tulai mai i totonu o aiga ma afioaga.
O galuega ua faagasolo e faalapotopotoga tumaoti, ma matagaluega a le Malo ia ua galulue faatasi ma le Matagaluega o Leoleo ma Falepuipui o le unai pea o polokalame faalauiloa i afioaga eseese o Samoa.
Ua unai foi polokalame faalea’oa’oga i aoga auā lava le taumafai ia totō le fatu o lenei mataupu i fanau a o laiti. Ta’ua e Leoleo e tele lava galuega o loo faatino ae o loo alualu pea i luma le numera o tina ma fanau teine ua aafia pea soifua ona o le fasi, o le soona lafo i ai o faamatalaga ma le sauaina i solitulafono matagā.
O le Mapusaga o Aiga e agai sa’o i aiga auā le taumafai e saili fofo, a leai loa ua vili leoleo.
O le Faalapotopotoga o le Toomaga mo Tagata Puapuagatia, ua latou fesoasoani i tamaitai e oo atu ia i latou e ave mataupu nei i luma o le Faamasinoga.
O le Faataua le Ola o le galuega tele o loo taulai i ai, ina ia aua ne’i avea le faigata e feagai ma tina ma fanau teine, ma auala e oo ai i le isi laasaga leaga o le pule i le ola. E tofu lava le vaega latou ma le taulaiga, ae o le autū lava o le latou galuega ina ia mafai ona taofi sauaga ua faatuputupulaia i totonu o aiga.
O polokalame uma nei ua faaauau i lenei vaiaso, ina ia saga momoli le feau tāua e taofi sauaga i totonu o Samoa.
