E lē tuumāmāina e le vaega na o ese mai le ekalesia EFKS a Westmere, le mataupu e pei ona fetotoa‘i ai so latou lagona ma se talitonuga ma le taitai o le komiti a toeaiina o le ekalesia aoao, faapea le faifeau o loo tausia nei le aulotu.
O loo faamautuina pea, ma talitonu le vaega na o ese mai, o loo sa‘o ma talafeagai vaega uma sa mafua ai ona vevesi le aulotu.
O le saunoaga foi a le toeaina ia Ioritana Tanielu, e pei ona tali ai i mataupu sa lē fiafia ai lea vaega, ua atili lē faamalieina ai le tofa ma le moe i tamalii ma failauga, aemaise o le susuga i le a‘oa‘o ma muliauma eseese o lea foi itu o le galuega.
O le toe oo mai o tusitusiga ma se finagalo o lea lava itu, ua latou ta‘ua ai, o loo tutu pea e le toeaina le afi, ma ua faatusaina o se motumotu ua lē pe, a ua atili olaola tetele. E tusa ai ma faamatalaga sa toe faamatuu mai, o loo ta‘ua ai le faigata tele ona gauai, ma lolo‘u ane le finagalo faatoeaina e faia se isi laasaga mautu ina ia toe faatasi ai le fanau a le Atua.
Peitai o faaupuga ma faamatalaga e pei ona faasalalauina, ua atagia ai le faaituau, ma le lē faamaoni, atoa ai ma le lē mulimulitai i faavae ma faaiuga a le fono aoao a le EFKS. O loo talitonu atoatoa lea vaega o le aulotu, e leai se isi e mafai ona taofia i latou, mai le faaaogāina o le igoa Westmere, ona talu ai o i latou foi o isi sui faavae, ma sui moni o le ekalesia i Westmere.
Saunoa se isi sui matua o le vaega lea, o le tali mai a le toeaina, ua mautinoa ai lona faaaogāina o le komiti a toeaiina e fai ma ona lafitaga. O le aumai o faaiuga a toeaiina e faapea e faigata ai ona tali ma‘oti i le mataupu, o se saunoaga pepelo ma le lē sa‘o. E foliga mai ua mu loa le lima, tapa i le iofi e pei o lea upu.
E ui ina sa tulai ese ona o faafitauli e lē toe tau faailoina, peitai o latou lava o tagata o le laueleele ma sui faavae o le alulotu, sa faatuina ma amataina le lotu.
O loo ta‘ua foi i le tusitusiga sa aumai e sui o le aulotu a Westmere na tulai ese e faapea, o loo aumai molimau maumaututu mai isi toeaiina o Samoa, ma ta‘ua ai e lē mafai ona talanoaina le mataupu a Westmere i le fono a toeaiina, ona talu ai soo se taimi lava e laga ai, ma tagofia lea mataupu, o le taimi foi lea e tulai ai Ioritana ma faaui i tua le mataupu, ma le faamatalaga e faapea, e tuu mai pea ia Niu Sila ma lana Matagaluega e soalaupuleina la latou mataupu.
O nisi ia o vaega o loo ta‘ua ma o loo atili faamausalīina ai finagalo autasi o lea itu o le aulotu, i lo latou talitonuga o loo faatonufaleina pea, ma faia faaalatua le mataupu a Westmere. O le ala fefeu foi lea ma faatuai ona maua se tali mautu ona o tulaga lē sa‘o ma le piopio, e amata atu i Niu Sila, ma le taitai o le fono a toeaiina.
O loo ta‘ua foi i le tusitusiga lava lenei, e faapea sa talia aloaia lava e le faifeau o loo iai nei ma tausia pea le galuega i Westmere, lona faamālōlō ai e lē toe foi mai. Peitai ona o le tu ai o Ioritana i tua o lea foi faifeau, ma ia unai e aua le faamavae, na mafua ai ona toe nofo le faifeau.
E faapea se faamatalaga sa saunoa lava le faifeau ma ta‘ua ai, sa poloaiina o ia e le toeaina e aua ne‘i alu ese, ae nofo pea i le aulotu, la lea sa toe faigata ai le mataupu a Westmere lava latou ia, ma ua oo mai lava i lenei taimi.
O se tasi o tulaga lē manuia sa faia e le faifeau, o lona lafoina lea o se saunoaga matuiā i se tasi o tamaitai o le aulotu, sa ia faatonuina ai e alu e ‘ai, ma faō i le faleese se‘i tulou lava le faitau a le atunuu. O lipoti lava ia sa tusia mai ma sa tau faavasega pea lava, o nisi foi o faaupuga e faapea, ua leva ona saunoa le faifeau ma folafola ua fia omai lona aiga e faasa‘o le mataupu.
E lē gata i lea, ua tui soo e le faifeau ma tatala lona fusiua i luma o le aulotu i ana fonotaga, pe a fesiligia i mataupu tau tupe.
O le a faapefea la ona tausisi pea ma saga opogi le faifeau ae lē se‘i faafofoga, ma silasila i amioga faatino e iloa ai ma fua i ai le faaiuga, ma le moni o le finau atu a le aulotu. Ua lē tasi, a ua atu lasi faiga lē manuia a le faifeau i la matou mafutaga, ma o le ala foi lea ua matou lē toe fia foi ai lava i le aulotu, seiloga lava e aveese le faifeau lea. O finagalo faaalia uma lava nei mai sui o le vaega na o ese mai i le aulotu i Westmere.
O loo ta‘ua ai foi se tusi sa tuu i le toeaina e se tasi o ulugalii sa aulotu ai i Westmere, ma o le tusi foi lea o loo tele se masalomia o se malosiaga sa iai, sa mafua ai ona fautua malosi le toeaina, ma unai le faifeau e aua ne‘i tulai ese. O nei lava vaega ua matuā toe aliali uma a‘e ona o le loto tiga lava, ma le lē malilie i le tulaga o loo faatautaia ai le manu‘a faalotoifale o le aulotu.
O loo faailoaina foi finagalo ma fesiligia le amiotonu o faaiuga a le toeaina sa faia aemaise ai, o le leai o sana galuega sa faia ina ia seu ai le mataupu e aunoa ma le tagofia e le faamasinoga. O se mea sa matuā ofo ai lea vaega o le aulotu, ona sa faapea mai le toeaina, e manumanu i le igoa o le ekaleisa aoao. O fea la o iai lea tulaga pe afai ua na lē mafai ona faia se tulaga toafilemu, ma aua ai ne‘i pua‘ina i fafo mataupu tetele sa feagai ma le aulotu?
Ua savalia le fā tausaga o feagai pea ma le faafitauli, o le fā foi lea o tausaga e leai ma se faamaulalo o le faifeau, ona e mafua mai i le toeaina taitai ma ana faiga faaitu‘au. Ua tia‘i le isi vaega, ae afisi ma sapai le isi ‘afa o le lafumamoe. E faapefea ona ia talia le faiga lē manuia sa faia e le faifeau, o le tuu o le nonogatupe atoa sa talosagaina mai le Toomaga, i le lana tusitupe, toe fai ma le isi nonogatupe e faatau ai lana taavale e aunoa ma le logoina o sui faatonu o le aulotu?
O lea foi ua matou toe faalogo, ua toe talosaga i le Ekalesia Aoao, ina ia aumai se $60,000 se‘i totogi ai la latou Loia mo le faamasinoga o loo faagasolo nei. Oka, o ni faiga amiotonu ea ia faiga, a o fea la le manumanu i le ekalesia o loo taulagi nei? E tele naua nisi o vaega o loo maioio ma taumafai le vaega lenei e tuuina mai mo le lomiaina, peitai o le tulaga faigata tele, ona ua mae‘a lava ona saunoa mai le toeaina ia Ioritana Tanielu i se talanoaga muamua, ma ia ta‘ua ai le lē toe mafai ona toe aumai sona finagalo i le mataupu lava lenei.
Ona o aiaiga ma le tulaga o loo faaiugafonoina e le Ekalesia, e taofiofi ai le soona faalauiloaina o mataupu ma‘ale‘ale faapea. O le tali mai a le toeaina i le lomiga muamua, ona o le faatauanau lava ma le tu‘itu‘i pea i ai, peitai sa faafaigata lava ona tali mai.
O le vaiaso fou o le a toe faaauau atu ai nisi o vaega sa tuuina mai e sui o le vaega lava lenei na tulai ese mai, ona o le naunau lava e logoina pea ma manino le atunuu i le mataupu o loo vesia ai ma tau saili malo ai le aulotu i Westmere.
