Matagofie ASB Polyfest o le 2011

O le vaitau lenei o le tausaga e tulimataia e fanau aoga i aoga maualuluga i Aukilani, aemaise lava i fanau a le Pasefika. E pei ona masani ai i tausaga taitasi, o le ASB Polyfest o se faaaliga tele lea o tu ma aganuu a tagata Maori ma le Pasefika, e faatino ai e fanau mai aoga maualuluga ma kolisi le tele o siva, o lauga, ma nisi o faafiafiaga eseese e mataulia ai o latou atumotu taitasi o le Pasefika e tupuga mai ai. i le tausaga talu ai, 2010, na tulai mai ai se matati‘a e silia ma le 90,000 i latou na maimoaina nei faafiafiaga a le fanau, e to‘a 9,500 le aofai o fanau aoga sa auai i faafiafiaga ia na faia faatauvaga mai aoga e 65.

O le polokalame na amata mai le Aso Lulu, 16 o Mati seia oo i le Aso Toonai, 19 o Mati, 2011. E ui sa faatauva, ae o le ASB Polyfest e tutasi lava ma mataina i Aukilani, auā o se faamanatuga foi lea o tu ma aga o loo mitamita ai le Pasefika ma tagatanuu foi o Maori, lea latou te tuufaatasia ai siva, o pese, o tautalaga, aemaise foi mamanu mai o latou faiva alofilima.

E moni e tulimataia le fiafia ma foliga lalelei o mea faatino, ae i le taimi e tasi, o se toe faamanatu pea lava pea i tupulaga o le Pasefika ua ola a‘e i totonu o Niu Sila nei, ina ia teufatu pea lana aganuu ma lana agaifanua o loo fai ma ona faasinomaga i soo se vaipanoa o le lalolagi o le a agai atu i ai.

Mo le tausaga lenei 2011, e lima ni fata faafiafia sa faatulaga i ai faafiafiaga a le fanau. O le fata mo le Atu Kuki poo Rarotonga, le fata a Maori, o Niue, o Samoa, ma le fata mo Tonga.

Sa iai foi se isi fata na faatulaga faapitoa mo faafiafiaga a nai isi foi fanau mai isi tupuaga o atunuu, lea sa aofia ai Saina, Korea, ma Initia, ma na matuā maoae le maimoaina o le lasi o faafiafiaga sa faatinoina e fanau mai soo se fata faafiafia sa tauva ai.

O le Kolisi a Sir Edmund Hillary Collegiate, na toe avea ma talimalo o le Polyfest i lenei tausaga. Ma sa latou filifilia le matua tauave lenei mo ASB Polyfest o le 2011 – “Diversity is the Magic, Unity is the Joy”.

Ua Ea le Pologa o Otahuhu, ina ua see Avondale i le Tulaga Lua

Mo le fata lava ia a Samoa, ua tulai mai ai nei se suiga i le tulaga manumalo i le tuufaatasiga o faafiafiaga i le vaega o aoga mo teine ma tama tuufaatasi. E pei ona silafia, ua tele tausaga o mafanafana le manumalo i le Kolisi malosi mai Avondale, lea foi sa tulimataia e tagata i lenei tausaga, poo le a toe osofai foi Avondale.

Peitai, o lenei ua pepese fiafia le Kolisi a Otahuhu i lenei tausaga, auā ua see ese nei ma le tulaga lua sa tu ai pea mo le tele o tausaga talu ai, a o lea ua see mai nei Otahuhu i le tulaga muamua, ma fesuiai ai o la tulaga ma Avondale i le tulaga lua.

O le kolisi a tamaitai, le Auckland Girls’ Grammar na tulaga muamua i faafiafiga a a‘oga na o tamaitai, ae o le kolisi a alii, St Peter’s College na manumalo i le vaega o faafiafiaga a alii.

O se atoaga o tulaga o le tauvaga o faafiafiaga a le fanau, o le a mafai ona auiliiili atu i nisi o talafou a le Radio Samoa i lenei vaiaso, a o faasolo ona faailoa aloaia mai iuga o nei foi tauvaga a le fanau aoga mo le 2011.

Momoli atu le faamalo ma le faafetai i le fanau aoga mo tapenaga matagofie, o susuga i alii ma tamaitai faiaoga i galuega fita i le faamaopoopoina o taumafaiga a le fanau, ae tainane foi le pitolaau a mātua i le latou lagolago malosi i aso taitasi a o iai nisi vaega faaopoopo i faasologa a le fanau i aoga.

O le faamalo tāua, e momoli i afioga a alii ma tamaitai faamasino, sa nafa ma le galuega mae‘ae‘a o le faamasinoina ma le amiotonu o faafiafiaga a le fanau. E molimauina e lei faigofie le tau faaeseesega o le taufai matagofie uma ma atoatoa o le tomai ua oo i ai faatinoga o faafiafiaga a le fanau, peitai o faaiuga na taunuu i ai, ua atoa ai le matagofie o lea vaiaso.