“Faitalia lava tagata na e o ma fai tala o lo matou faatau o oloa o le sunami. Ae a manaomia la le fesoasoani o ai e sulu mai i ai? A fia maua paina toto o ai e agai i ai?” o se tali ita lea a le Peresitene o le Koluse Mumu i sailiiliga a le tatou pepa e faatatau i le faatauga lavalava ma isi meatotino o loo faagasolo nei i Motootua.
O le vaiaso atoa na se‘i mavae atu nei na vaaia ai le faatuina o se faleie i luma o le nofoaga tutotonu o le Koluse Mumu a Samoa i Motootua ma ua tumu ai laulau o loo faatutū ai i totonu o ia fale‘ie ma oloa eseese. O lavalava, o ipu, o seevae, faamalu moega ma isi anoano o oloa ua faatau atu i le atunuu.
Na vaaia le agai o le aufaigaluega a le Koluse Mumu i containers poo pusa ia o loo tutū i autafa o le Ofisa ma la‘u mai ai iinā oloa pe a manaomia pe ua uma foi oloa o loo faatau i luma o lea nofoaga.
Ua lagalagā i lipoti atoa ai faamatalaga a le atunuu le faia o lea faiga ona ua mautinoa le tele o oloa nei o fesoasoani ia ua totoe mai i le tufatufaga na faia i aiga ma nuu na aafia ona o le sunami.
E lei fia tali mai se isi o le aufaigaluega a le Koluse Mumu ina ua tapa i nei faatauga o loo fai i luma o le latou ofisa ae se‘i vaganā ai le faamatalaga e logo muamua le latou pule poo le Peresitene foi o le Faalapotopotoga Fesoasoani.
E tele galuega laveai ma talosaga mo se fesoasoani na molimauina na feagai ma le Koluse Mumu i le amataga o le tausaga ona o le saili o fesoasoani mo mafui‘e i Kalaisetete faapea Iapani. E lē o masalomia foi le fesoasoani faifai pea a lenei faalapotopotoga auā le taumafai ai e faamāmā avega i aiga ua moomia se fesoasoani ona o aafiaga na feagai ai le atunuu ma mafui‘e ma sunami i tausaga e lei mamao atu nei ma na matuā iloga le malosi o le aao mafola o tagata mai i fafo ona o le tali mai i puapuaga o Samoa.
O le fesiligia o le Alii Peresitene o le Faalapotopotoga ona o le fia iloa lava pe o iai se tuutuuga poo ni aiaiga foi i lalo o Faiga Faavae a lenei faalapotopotoga faavaomalo ua aofia ai ma Samoa, e tatala ai le avanoa e faatau ai fesoasoani mai i fafo. Tusa pe lē o ni fesoasoani mai i le sunami, ae mautinoa lava o oloa nei o fesoasoani mai i nisi tagata poo nisi atunuu.
O loo iai lipoti ua oo mai e faapea, o loo moomia se seleni e faatino ai le tele o galuega laveai a lenei faalapotopotoga ma o le tele o nei oloa ua na o le tutū ai i totonu o containers ae e lē o toe manaomia i le mae‘a ai ona tofutofusia aiga ma ua matuā lava ma totoe meaalofa na o latou maua ona o le sunami. Peitai o le tali ita mai lea a le Alii Peresitene e atili lagalagā ai finagalo o nisi.
“Ae a sue le toto o ai e o i ai, a fia maua se laveai o ai e agai i ai le atunuu?” o se faamatalaga lea a le Afioga Faleao Maka Sapolu ina ua fesiligia. “E lē mafai ona ou tali atu ou te leiloa oe ae ou te lē manao foi e lolomi tala ia e fai atu ai auā ou te lei vaai lelei ia te oe”.
Ua lua sailiga e lē maua atu se isi e pulea lenei faalapotopotoga ona o le tele o o latou tuatuagia, ae na mafai ona maua mai ata o le faatauga oloa ma faatalitali ai nisi e mafai ona tali mai i suesuega. E lei iai se isi ma na faato‘ā maua i luga o telefoni. O le Koluse Mumu e pei lava ona silafia e lē o se faalapotopotoga o loo maua sana tupe i taimi uma o le tausaga ma e faamoemoe lava i le aao foai o isi faalapotopotoga ma atunuu.
E pei foi o ona lala i isi atunuu, a maua fesoasoani tau tupe mo galuega faagasolo, e iai le pasene e mafai ona tuu e le faalapotopotoga o seleni nei auā le faatinoga o ana galuega faaofisa ae e laititi auā o le tele o lenei galuega ua faia e aunoa ma se totogi.
Atonu o le mafuaaga lea o le moomia o se seleni e faatino ai a latou auaunaga.
Ona pau lava le auga o le suesuega e tatau ona faamalamalama ia tulaga uma, auā e lē logomālie foi ia i latou na tele se taimi o alu e saili mai nei fesoasoani,le faalogo mai ua faatau atu e aunoa ma se tala pe aisea ua lē soo ai le tufaga
o nei alofa mai i fafo, ae aisea foi ua faatau ai poo moomia mo‘i se fesoasoani pe leai foi.
