Uiga Faatamā Luka 15:11-32 (Vaega Fa)

O lea ua tatou agai se‘i vailiili uiga matagofie o le tamā, auā o ia moni le autū o le faataoto.
O le faapogai o faataoto, ona ua muimui le autusiupu ma le aufaresaio ma faapea ane, “ua talia e lenei tagata o ē agasala, ua aai faatasi ia ma i latou.”

O le tele o taimi, pei o le ui‘i le autū, ona ua tele ina faatauā le salamō o le ui‘i i lauga, ae ua misi ai le aano atoa o faataoto. I nai vaiaso ua mavae, sa tatou tagatagai ai i le ui‘i ma le ulumatua. Tatou faaiu i le tamā, auā o le ata atoa lea o le Atua.

Alofa
Ina ua foi ane le ui‘i, sa iloa mamao atu e lona tamā, ona mutimutivale lea o lona alofa, ua tu i luga ma tamo‘e e faafetaiai ia te ia. E lē logomālie i le autusiupu ma le aufaresaio le vaega lea o le faataoto, sa inoino i le ui‘i, auā sa manatu ua matuā loloto ma maualalō le mea ua oo i ai.

E leai se avanoa e toe foi ane ai, ua oo i agasala e gata ai agasala. Auā foi o le aai faatasi o se talavou Iutaia ma ni puaa o se mea e inosia tele. O lona iuga, ua oti. Leai se faamoemoe.

A tamo‘e se alii taualoa i totonu o le aai i tu a atunuu i Sasa‘e, o se mea matagā ma le lē mafaufau. Auā foi, e sisi i luga le ofu tātapuvae, ona momo‘e lea. A o lea ua fai e le tamā i lona atalii.

O faailoga o le alofa naua, ua lē popole ai i tu faaletagata, ae momo‘e e faafeiloai ma le fiafia le atalii ua foi mai i le aiga. Sa mamafa i lona loto, ma manatunatu alofa ma si ana tatalo – foi mai.

E lei gata ai iinā le alofa o le tamā. Ua ia silafia le atalii matua ua lē ulufale, ona ulufafo lea e faaoleole. Sa taumafai e faamatala le uiga o le fiafia ua fai, ona o lona uso ua toe foi ane i le aiga.

Uma na momo‘e ma faatāsina lona tagata ona o le fiafia i le ui‘i ua salamō, a o lea ua tuu lona tulaga mamalu faamatai o le aiga, ae ulufafo mo le atalii matua.

Ui‘i
O le ui‘i, o loo faatatau ia tatou. O le ata o tagata o nuu ese. Sa tatou omai uma lava i le Atua, peitai ua avea le agasala ua valavala ai ma ia. Sa matuā gogoto i le loloto o le agasala, soifua i ni soifuaga faapaupau ma le lē taupulea.

Ua lafoai le Atua ae faasaga atu i tuinanau o le lalolagi, ma le manatu – tatou te lē manaomia le Atua. Ae ina ua maua e puapuaga, uma le malosi, gata le iloa, ona toe atamamai lea.

Samoa e, o le taimi lava tatou te salamō ai ma liliu i le Atua, na te matuā talia lava tatou e pei o le ui‘i.
Ulumatua

O le manatu faasausili sa i le aufaresaio ma le autusiupu, o latou o tagata filifilia, o tagata tausi tulafono.
O le ala foi lea o le muimui ina ua aai Iesu ma tagata agasala. Ae silasila i le Roma 2:1-3: “O le mea lea ua lē mautali ai oe le tagata o lē faasalaina atu, auā o lou faasalaina atu i se tasi, ua e faasalaina ai oe e oe; aua o oe lē faasalaina atu, ua e faia ia lava mea.”

Ua faamasino tagata Eleni ia latou agasala, a o agasala foi lava na o loo faia e tagata Iutaia. Ua na o se faataitaiga, ua lalau le gaoi o Eleni, a o Iutaia foi e gaoi, ma isi lava agasala e tutusapau ai latou. O le uiga lea o le mau a Paulo, lea foi e taumafai Iesu e faapupula atu i le autausi tulafono ina ua muimui i lona feoai faatasi ma ē agasala.

Tamā
O loo taumafai le tamā e fai se leleiga i lana fanau, ia mafai ona ulufale faatasi i lona manuia. Ua silafia e le tamā, e sese lona atalii laitiiti, sese foi le atalii matua.

E aliali mai ai le natura o le tamā, na te faamagalo ē ua o ese – toe foi mai, atoa ma isi o loo faapea, e ta‘uamiotonuina latou i galuega o le tulafono.

O le tala a Paulo ia Roma; “… aua ua uma ona mōlia e i tatou o Iutaia atoa ma Eleni, o loo nofo sala i latou uma. Faapei ona tusia, E leai sē amiotonu, e leai lava sē tasi …”

Poo ā talitonuga ma ni o tatou tupuaga, o tatou uma lava ua pa‘ūū talu le amataga. A o lona finagalo, ia tatou salamō. Poo le ā le soifuaga o tatou iai, na te matuā talia ma le fiafia i tatou uma, pe a salamō faamaoni.

Ou te manatu, e tatau ona ta‘u lenei faataoto, o le faataoto i le tamā alofa. Auā o le auga lea sa faamatala ai e Iesu. Se‘i faailoa i le autusiupu ma le aufaresaio, o lana misiona na auina mai ai e lona tamā, ia faaola lē ua oti, ma saili ia maua lē ua leiloa.

O le iuga o le faataoto, na faaiu faanoanoa. Leiloa le tupe, toe maua. Leiloa le mamoe, toe maua. Ae talofa, i le tagata faafiaamiotonu – e leiloa e faavavau.

Sa manatu e leai se poloaiga na ia solia, a o lea ua lē ulufale i le fiafia o loo fai e lona tamā ma le uso ua salamō.

O se toe fafagu, toe silasila toto‘a. O lā Paulo, “inā tofotofo ia outou ia te outou, po ua outou i le faatuatua, inā suesue ifo ia iā te outou; … po ua i totonu iā te outou o Iesu Keriso…” (2 Korinito 13:5).

O lou alafai mai i lenei aso fou, o se isi lea avanoa mai le tamā, e fai ai ni filifiliga manuia.
Soifua