Ua savalia i le fa vaiaso talu ona tuua e le auvaa ma le vaa a Samoa, le Gaualofa, Aukilani mo le malaga taamilo i le lalolagi e pei ona faamoemoe i ai. O le fa foi lea o vaiaso talu ona lipotia ma faailoaina e le Samoa Times, ma le Radio Samoa le tuuvaa ese o le Gaualofa, faapea le uiga o le malaga taamilo.
Sa faalauiloa foi o le a fesootai mai pea le auvaa ina ia mafai ona silafia pea e le mamalu o le atunuu tulaga uma o le malaga a o iai i luga o le sami, faapea nisi o atunuu ua faamoemoe e afea ma malolo i ai.
O se lipoti lata mai e pei ona logoina mai sa ta‘ua ai e faapea o le tamaitai o Akenese Luuga ua toe faafoi nei i le atunuu ona ua gasegase. O ia e toatolu i ai tamaitai sa filifilia mo le auvaa a le Gaualofa o loo fai ma sui o Samoa i lea foi faigamalaga umi i luga o le sami. O loo iai le faamoemoe e toe taliu Akenese e faaauau ona tiute i luga o le Gaualofa, pe a toe maua lona malosi ma toe faafoi lona soifua maloloina.
I se lipoti sa tuuina mai, sa ta‘ua ai le tulaga faigata tele sa faafeagai ma le faigamalaga, ona o tulaga o matagi malolosi ma uiga louloua o le tau. E oo mai lava i le taimi sa tuuina mai faamatalaga mulimuli i le vaiaso na tea nei, o loo ta‘ua ai le faaauau pea ona leaga uiga o le tau ma matagi o loo faafetauia le malaga. E ui i lea, o le mea sili e lei afaina poo ua iai se tulaga mafatia ua aafia ai se tasi mai vaa uma o le faigamalaga, ae o loo manuia uma.
E lē gata i le vaa o Samoa le Gaualofa, ae faapea foi isi vaa e ono mai isi atunuu, faatasi ai ma vaa e lua o loo faafoeina e tagata Maori. Ona o tulaga faaletonu o le tau ua mafua ai ona faafaigata ma tuai ona taulalata vaa i le malologa muamua, poo le atunuu e pei ona fuafuaina e taunuu i ai talu mai le taimi atoa na tuuvaa ese ai ma Aukilani.
O le tulaga i taumafa i meaai ma mea inu, sa ta‘ua ma lipotia le tulaga lelei ma o loo lava tapena mo taimi faatulagaina. Ae o liopti faaopoopo e pei ona ta‘ua e le tamaitai o Akenese, se tasi o le auvaa o loo iai i Samoa, sa ia faailoa ai le malolosi ma le maloloina uma o isi sui o le auvaa a Samoa. Sa ia molimauina foi le lelei o le faafoeina o le vaa e le alii kapeteni e pei ona filifilia, ma o se tulaga tāua lea ma le fesoasoani mo le auvaa atoa ma ana galuega faagasolo a o iai pea i luga o le vasa.
O le faagasologa o galuega i luga o le vaa, sa ta‘ua e faapea o loo fai taimi pe fai sifi foi. O lea faiga ina ia maua e tagata uma malologa talafeagai, atoa ai ma le faatumauina o le malosi e faataunuuina ai tiute ma gaioiga masani i luga o le vaa. O Hawaii o le malologa muamua lea e pei ona ta‘ua, masalo o le isi lua i le tolu vaiaso e faamoemoe e taunuu ai i Hawaii.
E faamoemoe lava o le a maua mai pea fesootaiga e pei ona fuafuaina, ma logologo ai pea le mamalu o Samoa i le tulaga o lenei faamoemoe o loo auai atu ai le Gaualofa e fai ma sui o Samoa i le malaga taamilo i le lalolagi. O le masina o Me o le tausaga fou o loo faamoemoe e tatau ai ona toe foi mai lea malaga umi ma faamae‘a ai i le Pasefika.
