Ua faatali nei le itumalo o Sagaga Le Falefa i se faaiuga a le faamasinoga o le a fofogaina i le Aso Faraile, 13 o Me 2011 i le tagi o le palota a le afioga Loau Solamalemalo Keneti Sio.
O loo finauina i le tagi a lē sa avea ma faipule o Sagaga Le Falefa i le paeaiga ua mavae atu a le Palemene, le lē atoa o le tolu tausaga na nofo ai i Samoa le sui faipule manumalo le afioga Tuisa Tasi Patea.
O aiaiga o le tulafono o faigapalota o loo fai mai, a lē itiiti ifo e tatau ona 240 aso e nofomau ai i Samoa se tasi e fia tauva i faigapalota e sailia ai tofi faipule o Itumalo i le Palemene.
O le Aso Lulu, 4 o Me 2011 na tulai ai le Komesina o Faigapalota le afioga Tanuvasa M Isitolo Lemisio, mo lana molimau, ona o ia ma lona ofisa le isi itu o loo faasaga i ai le tagi a Loau Solamalemalo Keneti Sio. O loo tuuaia le Komesina i lona talia o le tulaga agavaa o Tuisa Tasi o se sui tauva o Sagaga Le Falefa, ae e lē o faamalieina le aiaiga i tulaga agavaa o sui tauva.
O le molimau lea a le afioga Tanuvasa na ia faailoa ai i le faamasinoga e faapea o se sasi o se tasi o lona ofisa na faitauina aso sa nofo ai Tuisa i Samoa, le mafuaaga ua lape ai lana faaiuga.
Na ia faailoa foi i le faamasinoga i lana molimau e faapea na ia faato‘ā iloa le mea ua tupu i le sasi a lona ofisa, ina ua ia tauaaoina le kopi o le tagi tau palota a Loau, lea na ia tapa ai loa se fautuaga a le Loia Sili a le Malo.
Na ia faailoa foi i lana molimau o le mae‘a ona toe siaki uma pepa na tuuina atu ina ua tapa e lona ofisa faamaumauga o malaga a Tuisa mai le ofisa o femalagaiga i le Matagaluega a le Palemia na iloa ai e lē atoa aso sa nofo ai i Samoa lē ua faasaga i ai le tagi.
Peitai o loo finau le loia a le faipule o Sagaga Le Falefa le susuga Seiuli Faaolesa Katopau Ainuu, sa agavaa le afioga Tuisa e tauva i le palota, e tusa ma aiaiga o le tulafono e faasino ia i latou e iai mafuaaga e malaga ai i fafo ma tuua le atunuu ona o ni tiute faalegaluega.
O le tausaga e 2006 na foi mai ai i Samoa Tuisa ma faamautu ai loa ona ua leai nisi o lona aiga. Ae sa fai ma malaga i fafo i ni fonotaga ona o ia o le Pule faatonu o le pisinisi a lona aiga o se falekalapu le Apia Way e vaai ma faagaioia e lona faletua ma ona alo e faamautu latou i Aukilani i Niu Sila.
O le tausaga e 2008 na malaga ai foi i se fonotaga ma se tapenaga o se fusuaga faapolofesa a le kamupani o le Event Polynesia lea sa avea ai o ia ma se tasi o faatonu poo Director. Na iai foi se isi ana malaga i se isi fusuaga faapolofesa a le Event Polynesia i le tausaga lava lea, peitai na mae‘a loa le fusuaga lea ona faamavae lea ua lē toe avea ma se tasi o faatonu.
O finauga faaiu a loia a itu e lua na tuuina atu i le Aso Tofi, 5 o Me 2011 sa molitai ai lava le mau a le itu e faamaonia ai le latou mau, ae peitai o loo silasila nei alii faamasino le afioga Lesatele Rapi Vaai ma Vui Clarence Nelson, i molimau uma o le mataupu ona aumai ai lea o se faaiuga.
