Toe aumai i Niu Sila Maria Brown ma lana tama o Prince

O le tamaitai o Maria Brown na soifua ane i Samoa e pei ona faailoa mai i tusitusiga a le Herald i le vaiaso nei, sa malaga atu i Ausetalia i le tausaga e 1997 ina ua ia faaaogaina le tusifolau Niu Sila ina ua maua lona sitiseni i le atunuu nei. E lei faigofie i leoleo ma le au fai tulafono ona taofiofia ni faasalaga e faia agai i lenei tamaitai ona o le tele foi o vevesi ma faalavelave na aafia ai muamua. O le tulaga ua iai nei lenei tamaitai e pei ona faailoa mai i lipoti lata mai e faatatau i lenei mataupu, ua faatonuina nei e le tulafono a le atunuu o Ausetalia ina ia toe foi mai i Niu Sila nei e aumau ai. O le faalavelave lata mai nei na aafia ai le tamaitai lea ma lana tama o Prince faatasi ai ma nisi e toatolu na maua lelei ai i ata a le CCTV lo la faaoolima i se tasi o alii i se kalapu sa tafafao ai.
O ata na molimauina e leoleo mai le CCTV o loo iloa ai le ogaoga tele o le faaoogamanua na faia e lea tamaitai ma lana tama i le o loo aafia e ala lea i le takiki faafia o le alii sa pau i lalo ma solisoli lelei e le alii o Prince le ofu poo le jacket o lea alii o loo tusia ai igoa o le kegi a le Gypsy Jokers. O lenei faalavelave ua le lava ai foi le onosai a leoleo i le faaitu lea o New South Wales ona o le faatupu faalavelave tele o le toalua lea mai Niu Sila nei.
O le masina fou o Mati lea ua fuafua e tatau ona toe aumai ai i Niu Sila nei ma ua maea nei ona tuuina mai i ai le poloaiga mai le komesina o leoleo a Ausetalia atoa ai ma se faaupuga faapea “o tagata latou te le usitaia le tulafono a le atunuu (Ausetalia) e le tatau ona latou saafi i faamanuiaga o le soifua ai i Ausetalia”. O le 1999 na molia ai Maria i le faaaogaina o fualaau faasaina ma moliaga e faatatau i le gaoi, e 43 tausaga o Maria a o Prince e 23 tausaga le matua.