Sami le siamupini a le Fetu Fou

O ni lagona o le fiafia ma le faagaeetia e lagonaina pe a ae ma le malo aemaise foi pe a foi manuia mai se faiva sa tapuaia ma tuu atu i talosaga ia alofagia e le Atua. O lagona faapea na faalogoina e sui o le au kilikiti lea na sola ma le manumalo i le taamilosaga na sei mavae atu nei a le PIMKA, lea sa faataunuuina i Aukilani nei. O le au kilikiti lenei e mai le auaiga o Fuimaono Galu mai Salani, Leausa Samuelu, Pogiailelaoa Vaiala ma Segio Faasau mai Faleapuna.
O le tausaga na tea nei na amata tuufaatasia ai lenei au i le itupa o alii faapea foi ma tamaitai. Saunoa se sui o le aiga o Tiai e faapea, o le faamoemoe autu lava ia faamaopoopoina alo ma fanau a le aiga e le gata i alii ae faapea foi ma tamaitai i mea nei o faagatama. O le kapeteni o le au o Keki Sanerivi ma le lagolago o Auimatagi Kipa ma o le tausaga na tea nei na tulaga lua ai i le vaega pito i lalo o le taamilosaga, peitai ua maualuga le tulaga o le taumafai i lenei tausaga, ma faapaleina ai o le siamupini o le taamilosaga kilikiti a le PIMKA i lenei tausaga 2009.