O le vaiaso lenei e tulai ai ni tagata se toatolu i luma o le Faamasinoga Maualuga e tali i moliaga o le faia o ni faaputugatupe faasolitulafono i totonu o Samoa. O se moliaga ua laga ona o suesuega ua tele masina o faia e le Faletupe Tutotonu o Samoa e faatatau i nisi e masalomia lava le tetele o tupe e lafo mai i Samoa ma ua faamaonia e lē o ni auala e tusa ai ma le tulafono o teugatupe o loo faia i le atunuu.
O i latou na taofia ma ua toe tatala i tua mo le tulai ai i luma o le faamasinoga i lenei vaiaso, e aofia ai se tamaitai mai i le afioaga o Leulumoega faapea faamatalaga ua tele tausaga o galue i se tasi o faletupe i totonu o Lonetona i Peretania. O se tamaitai Samoa ua faaipoipo atu i se papalagi ma ua nonofo lava ma galulue ai i Peretania.
Peitai ua matauina i suesuega o loo aofia lenei tamaitai ma se isi alii papalagi mai i Italia i se faaputugatupe ua aumai ma teu i Samoa nei. O le lona tolu o i latou ua tuua‘ia i nei faiga faasolitulafono ua ta‘ua o se faafeagaiga i Samoa ma e foliga mai o ia le fesootaiga a i laua nei mai i fafo i le faatamoega o le faaputugatupe ua fesiligia nei i luma o le faamasinoga.
E lē o tele se isi faamatalaga ua faalauiloa mai e le Faletupe Tutotonu e faatatau i lenei mataupu ae na laga e le TVONE i le lua vaiaso talu ai faiga faaalatua ia ua matauina ua tele foi tagatānuu ma kamupani i totonu o Samoa ua suesueina ai ma na logo mai e le Faletupe Tutotonu le mataupu mulimuli lenei i le vaiaso na tea nei, a o faagasolo ai suesuega o isi kamupani e pei ona laga atu e tusitala.
Ona pau le faamatalaga o lea ua faasā ona tuua le atunuu e le tamaitai Samoa lenei ma lana paaga faipisinisi mai i Italia seia mae‘a le tulai ai i luma o le faamasinoga ma se tulaga e oo i ai lenei mataupu i Mulinuu.
Ua faaalia e le faletupe tutotonu o Samoa e foliga mai o lea e lesitala ni kamupani o loo agai mai tagata nei mai i fafo e faatutū i Samoa ae e maua mulimuli ane e lē o iai ni kamupani faapea ae ua na o faaputugatupe ua aumai i Samoa nei.
Na fesiligia le solitulafono o lenei faiga ona o lea e leai lava se tagata ae o se faaputugatupe i Samoa o loo afaina aemaise o lea o le a faaopoopo ai le tupe maua i totonu lava o Samoa ia e pei foi ona vaaia le faaaogā o nei auala e le tele o atunuu o le atu Karepeane ma o nisi o atunuu ua unai ai tamaoaiga o o latou motu laiti ae na ta‘ua e le sui o le Faletupe Tutotonu, o le faataga o faiga nei e mafai ai ona avea Samoa ma se tasi o atunuu o le a faaigoaina e i lalo o le lisi uliuli (black list) o atunuu e agai i ai faipisinisi ma teu ai a latou tupe ae ua lē totogia lafoga i atunuu o loo galulue ai ma o se faiga e ta‘uleagaina ai fua Samoa.
O le itu la i fesoasoani tau atinae e ono aafia ai Samoa i ana paaga o loo fesoasoani sa‘o mai lava ma aumai seleni mo atinae a le malo ma le atunuu.
O le talia o faiga faapea e lē o maua ai se tupe sa‘o mo atinae e pei ona ta‘ua ua faaalia e le faletupe tutotonu ua lē talafeagai tele lea. O lea la ua talia poo le ā le faaiuga o le a faia e le faamasinoga i lenei mataupu mo tagata ia e toatolu ae o isi foi mataupu o loo folifoli le tuu atu i le faamasinoga i teugatupe faasolitulafono ua faia i Samoa nei.
