Tusia: Merita Huch
Samoa
O lea toe lua vaiaso ona malaga ese loa lea o au taaalo a Samoa ua filifilia mo taaloga o le Pasefika lea e talimalo ai Papua Niu Kini i lenei tausaga. E 19 taaloga o le a faatautaia i ia taaloga ae e oo mai i le taimi lenei e lei mautu lava poo ai autaaalo o le a talia le agai atu mai i Samoa mo nei taaloga.
Ua fesiligia soo le Pulega o Taaloga ma le komiti o taaloga a le Olimipeka le SASNOC i le taumafaiga lea e faalauiloa le au a le atunuu ae ona pau lava le tali lea e sau, se‘i mae‘a lelei ona fili ni au lelei ona faailoa mai lea.
Ua agai lava le taaloga o le netipolo latou e saili tupe mo le totogi ai o le vaega tele o le masii atu mo ia taaloga ona o le manatu a lē gaioi e leai ma se tupe e maua e agai ai i papua Niu Kini. O lea foi ua agai le taaloga o le soka latou e fai lava a latou sailiga mo se seleni e ave ai le au soka a Samoa i Port Moresby mo lea lava faamoemoe ae o le au siisii uamea mamafa lea e ta‘ua e lipoti e mautinoa lava le ave e le malo auā e mautinoa e tofu pine uma lava pe a masii mo tausinioga nei a le Pasefika.
Ua ese le faamuamua lea ua iai, o le au e maua ai pine a Samoa o i latou na o le a ave i ai le faamuamua i taaloga nei ona o le tau faasoa foi o le tupe e ave ai i latou ia.
O le faatupega o faigamalaga nei ua faamoemoe i le malo e ala i le Matagaluega o Aoga Taaloga ma Aganuu. E lē gata i lea o le a faapea ona faamoemoe foi i le Komiti o Taaloga a le Pasefika auā le faatupega o nei faamemoe. O lea la e foliga mai o ai lava le au e mafai ona totogi e i latou a latou pasese ma le masii ai i Papua Niu Kini o au ia o le a mautinoa lava le malaga.
O le asosi a le volipolo o lea ua ave sana tusi e apili pe toe talosagaina ai le faaiuga ua lafo atu i le imeli e le SASNOC faapea e lē mafai ona malaga le auvoli e tauva i taaloga o le Pasefika.
O le mau a Sala Petelo, le Peresetene o le Asosi Volipolo, o le tolu vaiaso talu ai na logo atu ai le asosi e le SASNOC e sauni mo taaloga i Papua Niu Kini, peitai o le vaiaso na tea nei lea na ta‘ua ai ua logo atu ia ma faapea atu le SASNOC ua lē mafai ona masii le au voli a le atunuu mo taaloga o le Pasefika.
O se faaiuga o lea ua toe apili pe talosagaina e le asosi ona o le manatu ua le fetaui tele aemaise o lea na logo atu i latou e sauni. O loo sauni lava foi le asosi o le volipolo i le matafaga (Beach Volleyball) ona o loo iai lo latou manatu e ave sui o le au taaalo a le atunuu i lea taaloga i Papua Niu Kini. O le faafitauli na laga muamua e faatatau i le au taaalo lea ona o le itu lea sa sau lava i lona faavae mai o se sui o le asosi volipolo a Samoa ae ua manino o le asosi volipolo a Samoa e tele lava ina agai i volipolo ia e faagasolo i totonu o faletaalo.
O le amataga la o le tausaga na agai ai loa le kalapu volipolo i le matafaga a le atunuu ma lesitala o se Faalapotopotoga ua tutoatasi mai i le asosi volipolo a Samoa ma o iina la ua sau ai loa ma faitioga aemaise le faagaulemalie a le asosi volipolo a Samoa.
O le taimi lenei na ave le fautuaga a le SASNOC ina ia toe faamautu se tasi i taaloga nei e i lalo o le asosi volipolo ona e ono aafia ai le sao atu o le volipolo i le matafaga i taaloga faavaomalo.
O le fusuaga e lei faamautuina lava ae mo le tele o au taaalo ua na o le sauniuni lava ma faatalitali poo ai o le a maua le avanoa e malaga ma tausinio ai i Papua Niu Kini.
