Toatolu tamaitai i tulaga Faamasino i Samoa

I le faamasinoga o Soligatulafono o lea ua faamautu mai ai le tofia o le Susuga Leilani Tuala-Warren e avea ma faamasino. O lea tofiga ua toatolu ai tamaitai Samoa ua galulue nei i lea Faamasinoga.
O le tamaitai o Mata Tuatagaloa o loo i le Faamasinoga Faaitumalo. O le tamaitai faamasino mai Niu Sila, le Susuga Ida Malosi o loo i le Faamasinoga Maualuga, ae o lea e lei faamautu mai poo le faamasinoga maualuga poo le faamasinoga faaitumalo ua tofia i ai Tuala-Warren i lenei tofiga fou.
O Tuala-Warren o loo pule faatonu i le taimi lenei i le Komisi o le Toefuataiga o le Tulafono a Samoa. O se tofiga lenei ua lua tausaga o umia e lea tamaitai.
O Ida Malosi e pei lava ona silafia o se tamaitai faamasino muamua lea o le Pasefika ua i lea tofiga maualuga i le Faamasinoga a Niu Sila ae o le galue ai i Samoa nei ona o le manaoga o le Faamasinoga i Samoa mo se faamasino i le tele o galuega o loo iai nei i Fale Faamasino i le atunuu.
O le tamaitai o Mata Tuatagaloa o le lua ai foi lenei o tausaga talu ona tofia o se Faamasinoga o Soligatulafono ma e pei lava o Tuala-Warren o nisi nei o loia sinia i lenei vaitaimi ua tofi i ai nei tofiga.
O le tofi faamasino o le faamasinoga o soligatulafono e filifili i ai le Faamasinoga e pei ona iai le saofaiga a le Faamasino Sili ma isi faamasino o le Faamasinoga Maualuga faapea le Faamasinoga faaitumalo. E fua lava foi la i le talia e lea tagata o ia tofiga ma e toe fai lava i ai le filifiliga a le Faamasinoga aemaise o le tuualalo a le Sosaiete o Loia a o lei faamautu aloaia lea tofiga.
O Leilani Tuala-Warren, o ia e toatolu ai foi loia o alo nei o Tuala Misi e lei mamao nei ona tuumalo, ma le tina ia Aruna. O le fanau e toatolu o Seiuli Jack Tuala ma Melvin Tuala e loia uma foi, ma na latou faatūina se ofisa Loia i Apia e faaigoaina o Tuala Law Firm.
E tofia lenei tamaitai ae o loo feagai ma le galuega tele o le toe iloilo ma faatalatalanoa le tele o teuteuga o Tulafono a Samoa ma e mautinoa o le a iai se suiga i le Pule Faatonu o le Komisi o le toe Fuataiga o le Tulafono i le sui ai o le tofiga o Tuala-Warren.
O loo faatali le tamaitai faamasino fou i se faamatalaga aloaia a le Faamasino Sili le Afioga Patu Tiavaasue Falefatu Sapolu i lona tofiga ona faato‘ā mafai lea ona talanoa aloaia i tusitala peitai ona pau lana tala ua mafai ona aumai ua faapea mai ai o se tofiga maualuga ma o ia e na o le faagaeetia i le mafai ona maua o lenei foi tofi maualuga o le atunuu.