Toatolu Faamasino na faatautaia le apili a le Aiga Samoa i Logan City

O le Aiga Samoa i Logan City o sui lava nei o loo finauina le toe faafoi mai o Uarota Samoa i totonu o Brisbane e ui ina faaaogā le gagana Samoa peitai o Uarota Samoa o loo toe fia faafoi mai e pei ona aveese mai i le 2007.
O le Aso Faraile la, aso 24 o Me na faataunuuina ai le toe apiliina e le Aiga Sama ma se vaega o le Mafutaga Saili Malo i Ipswich i le fale faamasino a Ausetalia (Commonwealth Court) o lenei mataupu.
Ua toe afua lenei apili ona o se faaiuga sa faia e le faamasinoga i le 2010 e solofua ai le mataupu, lea ua tulai mai ai le tamaitai loia ia Leulua‘ialii Olinda Woodroffe e galulue faatasi ma isi loia e toalua o loo tutū mo le Aiga Samoa i Logan City.
O le iloiloga i lea aso na matuā fesiligia ai e faamasino e toatolu le loia a le ekalesia e tusa o le faaiuga na faia i lea taimi na matuā aafia ai le aiā tatau a tagata Samoa i Kuiniselani ua lē tusa lea ma le faavae o le Malo Ausetalia atoa ai ma vaega o loo iai le taiala a le Ekalesia.
Na maua ai iina le tele o isi vaega e lei oo i ai le iloiloga o le mataupu i le 2010, ma na ta‘ua e le loia o loo tulai mo le lotu, na te faamaonia lea vaega peitai sa lē mautonu ni tali, lea la ua tuuina atu i ai e le faamasino i le loia a le lotu, ia oo atu i le Aso Lulu, aso 29 o Me ua toe faafoi atu nisi faamatalaga faamaumauina e faamaonia ai le latou mau.
Ua ataata mai ta‘u lelei ma ua lagona le fiafia o i latou uma na auai aemaise le agaga faafetai i loia e toatolu e aofia le tamaitai loia Samoa, le Afioga Leulua‘ialii Olinda Woodroffe, ona o le talia o le apili.