O le aso 25 o Me i le tausaga na tuanai atu 2012, na amata faavae mai ai le mafutaga mo aiga o le Pasefika o alala ma saili malo i Melepone Ausetalia.
O atumotu o aofia i lenei faalapotopotoga e pei ona sa lipotia muamua i la tatou tautua lenei, e aofia ai Samoa, Toga, Fiti, Tuvalu ma Maori Niu Sila. O le laulau sa faafoeina le sa o le faalapotopotoga sa peresitene le Toga, failautusi le Tuvalu ae teuoloa le Samoa.
Sa tele ni galuega tāua ma le aogā na o latou faatinoina e fesoasoani ai i aiga tauatiae ma le limavaivai, aemaise lava o le faatupeina o tafaoga i mataaga, zoo, adventure park.
O faatinoga nei o loo olaola ai la latou mau tauave, o le taumafai e siitia le tulaga o tagatamotu o le Pasefika ma aiga Polenisia. Ma ua amata ai ona tupu lauolaola le miti sa faamemelo i ai nei tina Polenisia.
O le Aso Toonai na tea nei na faamanatuina ai le tasi tausaga o le asosi, ma fai ai ma la latou suiga tofi lea ua seei ane ai le faletua ia Pei Taulapapa o Samoa i le tofi paresitene, lagolagosua Taumalua Lolo o le Toga, failautusi Teuila Sopu o le Toga, ma le teuoloa o Wilhermina Faavaoga o le Samoa, faatasi ai ma nisi o sui tofia e toalima o le komiti, lea o le a soosoo tau‘au ma galulue faatasi ma le laulau ina ia tini ma taulau o latou valaauina ma tofiga. Faafetai ai i nei tina Samoa le faaea atunuu, ma le silasila toto‘a i le siitia o le tulaga o aiga limavaivai o Samoa o loo afifio i Melepone. O outou māmā na, ma faamoemoe pea i le Atua e oo mai ai lo outou fesoasoani, maua pea lo outou soifua manuia i le tino aemaise o le agaga, ina ia sisi ai pea le tagavai o Samoa i laufanua o Melepone.