E fesiligia lava le tulaga e oo i ai nisi o fanau teine ua i lalo nei o le vaavaaiga a le Toomaga mo ē Puapuagatia, ma ua faamautu ai seia mae‘a ona faagasolo soligatulafono ua faia faasaga ia i latou.
O le vaiaso na tea nei lava ia e toatolu ni teineiti na faapea ona momoli ane e o latou aiga i lea nofoaga ina ua alia‘e mai ai ni faafitauli i totonu o o latou nuu.
O le teine muamua lea e 13 tausaga le matua na faapea ona faatea ma lona nuu o Eva ona o le faamatalaga ua taumafai e faatosina atu tama talavou o le nuu auā ni faigaaiga faaleulugalii.
O se tuua‘iga ua matuā teena e lenei teineititi ae ona o faasalaga na faia i lona aiga e 30 pusa apa na ave i le nuu, ma le talitonuina e le nuu o molimau a tama talavou na faia faasaga ia te ia, o lea la ua faatea ese ai lea teineititi ma ua faapea nei ona ave e lona aiga i le Toomaga mo ē Puapuagatia.
O lea teineitiiti ua maliu lona tamā, ua toe fai le toalua o lona tina ae na tausi e le aiga o lona tamā i Eva lea la na tulai mai ai lenei faafitauli. O le tala a le afioaga e sili le aveese mo le puipuiga o tama talavou o le afioaga.
O le isi teineitiiti e mai i Magiagi, ua ma‘ito i se isi o lo latou aiga e sau mai i Malie ma ua ave e leoleo lea alii ua sola ese ina ua tulai mai le faalavelave i lea teineititi e na o le 11 tausaga le matua.
Ua faasala foi le aiga o lea teineititi e le nuu ae e lei faia se sala i le taimi lenei ona o le finauga a le aiga o le teineititi e lē fetaui tele le faaiuga ua faia ae o le teineitiiti lea ua aafia lona olaga i lenei solitulafono.
O le sala na ave e totogi e 50 pusa apa ma le $2,000 tala Samoa. Ua momoli ane le teineitiiti i le Toomaga mo ē Puapuagatia ona o loo galue faavaitaimi lona tina i Ausetalia ae na o ia ma lona tamā ma ona tuagane, ua matuā lē fiafia i le tulai mai ai o lenei mataupu ma na popole nisi o le aiga o lea teineitiiti mo lona saogalemu ma ave ai loa i le Toomaga mo ē Puapuagatia e tālia ai tagi ua fuafua e avatu i lenei mataupu.
Ua faapea foi ona agai ane le teine talavou lea na faalauiloa lona ata a o fasi ma faamalosi e se alii talavou o loo nofo nei i Maagao i lea lava faalapotopotoga. O le tamaitai lea na ta‘ua e le Toomaga, na matuā iloga le mafatia ina ua faalauiloa nei ata ua faapea ona ave ai e leoleo i le faamasinoga le alii na faia nei uiga matagā.
O le toatele o i latou ua matamata i ata nei na lagona ai le maasiasi o lenei teine talavou ma tapa ai se fesoasoani a le Toomaga mo ē Puapuagatia, lea la ua faamautu ai nei mo se taimi lē tumau se‘i masuigamālie atu lenei faafitauli.
O loo tetee le alii o loo tuua‘ia i lenei solitulafono ma o loo tālia le taimi e toe tulai ai i luma o le Faamasinoga auā le iloiloga o ona moliaga. O le tausaga fou faatoa faaauau ai lenei mataupu, o lona uiga o le taimi atoa foi lea o le a nofo ai lenei tamaitai i le vaavaaiga a le Toomaga mo ē Puapuagatia.
O le faamatalaga a le Peresetene o le Toomaga mo ē Puapuagatia, o lana faafetai o le silasila a le atunuu i le taimi lenei i le faalapotopotoga ma le fesoasoani e mafai ona ofo atu e ala i nofoaga e faamautu i ai i latou ua lagona le mafatia ma ua faapea foi ona aafia i soligatulafono.
O lea faatoa atoa le tausaga o le fale lea na tatala mo i latou ua sulufai atu i le faalapotopotoga atoa ai ma se isi fale i Motootua ua faapea ona faaagaga mo lea lava faamoemoe, ma na ta‘ua e Chang ua faatuputupulaia lava le numera o i latou ua agai atu mo se fesoasoani, ma o faailoga o le lē faaitiitia o sauaga o loo vaaia pea i totonu o le atunuu.
