Masalo o tapenaga a le Manusina o le tausaga nei ina ua mae‘a taaloga sa saili ai le ono ofi atu o le Manusina i le Ipu o le Lalolagi 2014, ua matuai vaai ai le taufai pati mai o le toatele o tamaitai taaalo e lē gata i totonu lava ia o Niu Sila ae faapea foi Ausetalia, Samoa ma nisi o atunuu mai fafo,.
O vaaiga faafiafia loto ina ua molimauina i lea aso le toatele o tamaitai e masalo e latalata i le onosefulu le aofai ua tuufaatasi o i latou sa tausinio mo le Manusina. E pei lava foi ona silafia, o le Manusina lea sa tofia i ai le afioga i Le Papaliitele Peter Fatialofa e avea ma Faiaoga-ulu ma e tuumalo nei o loo ia tauaveina pea le tofiga o le faiaogaulu mo le Manusina.
Na matuai faatumulia le malae lakapi i East Tamaki Rugby Club i Otara i le faaiuga o le vaiaso na se‘i mavae atu nei i lea faamoemoe. Ta‘ua e se tasi o le pulega a le Manusina, e maeu le agavaa ma le tomai o tamaitai uma, ma o le toatele lava foi o i latou o loo taaalo i le tele o taamilosaga faaitumalo, faapei o le NPC level.
Sa faatautaia ia taaloga e le pulega lava a le Manusina faatasi ai ma le lagolago mai a nisi foi mai le Iuni lakapi a Aukilani. Sa vaaia le fiafia o tamaitai i lea aso i trials faapea le lagolago o aiga.
Sa vaaia ai foi i lea aso nisi o alii lakapi sa taaalo muamua i le Manu Samoa, na agai atu e lagolago i le sailiga poo le filiina o le Manusina. Na ta‘ua e le Peresetene ia Toleafoa Mara Hunter le agaga fiafia tele ona e tuumalo nei Le Papaliitele Peter Fatialofa, ae ua uma ona faapepaina uma tiute saili mo le faiga filifiliga o sui o le Manusina.
O polokalame uma e faagasolo ai faatinoga uma ina ia mautu lelei faatasi ai foi ma le lava sauni ai o le Manusina mo le Ipu o le lalolagi o le 2014. Molimauina e le Peresetene ia Toleafoa Mara Hunter le lava saunia lelei o nisi o tamaitai sa auai mai mo trials. Ina ua mae‘a trials i lea afiafi ona alo atu loa lea i se taumafataga afiafi poo le Dinner e faamasani ai tamaitai i isi uma sa auai faapea foi ma le pulega a le Manusina.
Sa saunoa le Peresitene i lea afiafi e faafetaia tamaitai uma sa tausinio mo le Manusina aemaise ai foi le avanoa e ono filifilia ai mo le Ipu o le lalolagi ia Aukuso o le tausaga fou. O moomooga ma saafiafiga aemaise faamanuiaga mai le Peresetene mo tamaitai uma ina ia manuia.
Sa ta‘ape fiafia lea afiafi ma toe taliu ai le faigamala a le afioga i le Peresetene i Samoa. Masalo o se aso lava o lenei vaiaso o le a fofogaina ai le ‘au atoa a le Manusina e tauina le taua ia Aukuso 2014. Tatou faamoemoe ma taupule ola ai lea faamoemoe ia tatou aulia atu ai ma le fiafia tele.
