Ua molimau mai le ofisa o le komesina o faigapalota i Mulinuu i le toatele o tupulaga ua aulia le 21 tausaga o le matutua e mafai ai ona palota ile sailiga o tofi faipule o le Palemene, ua faamauina nei o latou suafa i le lola ua lesitala ai le aupalota o le itumalo o Gagaifomauga Numela muamua lea o le a faia le latou palota laititi i le aso 15 o le masina nei o Aukuso.
Faaalia e se tamaitai ofisa sinia o le ofisa o faigapalota, ua ese le tulaga ua vaaia ma molimauina i le lolofi atu o le ‘au 21 tausaga e lesitala, ma o le molimau a lea ofisa sinia o se vaaiga lea i le lagona e tupulaga talavou ua atoa le 21 tausaga le tāua o le aiā tatau e auai ai i le filifilia o sui o itumalo aemaise o le filifilia o ni taitai o le Malo ma le atunuu.
“Ou te lagona lava o le tāua lea o faalauiloia a le ofisa o loo alu i luga o televise i le logologo atu i le atunuu o le taua o le lesitala e avea ma tagata palota”, na saunoa mai ai le tamaitai ofisa sinia ua lē finagalo e faalauiloa lona suafa.
O le molimau a lea ofisa sinia na ia faailoa ai foi, o le toe tatala o le lesitalaina o tagata palota mo le itumalo o Gagaifomauga Numera muamua auā le palota laititi o loo loma a lea itumalo, na iloa ai o le toatele o i latou na lesitala ma faaopoopo ai le numera o tagata palota mo le itumalo o tupulaga ua aulia le 21 tausaga le matutua.
E to‘a 190 ua faaopoopo ma o loo fulisia i le au palota o tupulaga ua aulia le lua sefulutasi tausaga le matutua. O le aofaiga sa iai le lola a lea itumalo talu mai le palota tele o le tausaga e 2011 e 1,210, peitai o lea ua faaopoopo ma maua ai le aofaiga e 1,164. E na o le lua nuu tetele o Gagaifomauga Numera muamua o Safotu ma Manase.
O lea foi la ua tapunia le faauluina o sui tauva mo le palota laititi a le itumalo ma e toalima lava sui faatutū ua lesitala, e toafā mo le HRPP ae toatasi lava le Tautua Samoa. Peitai na faaalia e le tamaitai ofisa sinia o le ofisa o le Komesina o faigapalota e lua vaiaso o loo avanoa ai ona toe faaui i tua se suafa o se sui faatū. O se tasi lea o aiaiga o le tulafono o faigapalota ua manatu nisi ua tatau ona teuteu, ina ia taofia ai nisi faiga faaalatua e lē tatau ona tupu i le lumanai. Faaalia e se tasi o molimau o le piliota lea e aiaia e toe faaui ai i tua se suafa o se sui tauva, e tele lava mea e tutupu ai.
E mafai ai ona togi tupe e se sui tauva se isi sui faatū, ae ave i tua le suafa ona o le manao e avatu uma le lagolago e manumalo ai i se faiga palota.
O isi palota tetele a le atunuu ua tuanai sa laumanu‘ia ai tala e faapea o nisi sui na maua le tailua sefulu afe poo le sili foi ina ua alu i ai le savali a se isi sui e tele tupe, ona tauanau lea e malolo ma tapuai ae lafo atu le lagolago e alu ai i le palota.
O nisi ia o faiga faaalatua poo faia piopio o loo taumafai pea e titina ma le afaina ai pea o le igoa lelei o Samoa ana faiga filifiliga i tofi o itumalo i le Palemene.
