Ua logologoā tala ave o lenei foi ata i lona vaega muamua sa iai, ona o vaaiga moni o loo tutupu i si o tatou atunuu o faaalia ai, na lē manofo lelei ai le tapuaiga mo le vaega lua pe faape‘ī. E taunuu la tatou pepa i le faleoloa o le Kiwi Pacific i Broadmeadows e lei tāina le itula e sefulu i le taeao o le Aso Faraile na tea nei, o se itu na faateia ai ona o le faatumulia i le paia lasilasi o le atunuu, na usupo e saili le sosooina o le mafutaga a Masi ma Lili pe na tua ma ni ā.
Na faafeiloai e le faatonu o le ata le afioga ia Aiolupotea Polu Paletaoga la tatou pepa i fafo ona ua lē maua se ofi i totonu, e ui o se aso ese le malulu lea aso.
O se itu mataina na molimauina, ona o le agaga faaeaea ua iai le aai o Melepone, ona e mai lava i tuaa sinasina ma tuaa alii seia oo lava i fanauiti, na taupati atu e sapasapaia le sailigamalo a Aiolupo.
O nisi foi na faimalaga mai i pitonuu e itula le mamao, ae o le toatele lava foi na faatau tailua taitolu ata, o le vaaiga lava foi lea na iai le Aso Toonai na sosoo ai i le pitonuu o Laverton.
Na molimau ai nisi tamalii, na o latou faafofoga i faatalanoaga i luga o leitio, na molimau ai nisi i le mālie ma le manaia o le vaega lua, lea foi la ua lē manao latou e misi.
I le feiloaiga ma le afioga a Aiolupo na ia saunoa ai e tatala le vaega e tolu a o lei faaiuina le tausaga nei. Momoli ai le faafetai i taleni ma meaalofa a lenei tamalii, ua faamalieina ai le silamaimoa a Samoa.
