E toalima alii ma se tina e toatasi mai se aiga i Tiavi poo se pitonuu i le agai i Afiamalu o le a tutulai i le Aso Gafua o le vaiaso nei, aso 28 o Fepuari 2011, e tali i moliaga o le totoina ma le umia o laau faasāina o le maruana.
“Ua matauina pea e le matagaluega e lē o faaitiitia le solitulafono e fesootai ma le maruana, ma o le isi lea osofaiga a leoleo na maua ai se togalaau maruana i Tiavi”, na saunoa mai ai le Sui Komesina lagolago, afioga Leaupepe Fatu Pula.
E 47 laau na maua o o latou uumi e mai le 5 i le 7 futu.
O nisi o laau ua matutua ma sa selesele ma faaaogā e pei ona faaalia e le komesina lagolago.
Ua taofia e leoleo le faalauiloaina o suafa o tagata e toaono o le aiga ua molia i le faia o lea solitulafono.
“O le Aso Gafua, 28 o Fepuari e oo atu ai i latou i luma o le faamasinoga, ma o le a iloa ai o latou suafa mo le faasalalauina”, na saunoa mai ai Leaupepe Fatu Pula. E lē gata ina maua laau maruana, ae na maua foi ni faamiliga o laau ninii faato‘ā ola faapea ma fatu maruana e silia i le tasi le afe.
O se vaitaimi o le tausaga e 1986 i le 1987 na osofai ai foi e leoleo se fanua o se aiga i Tiavi lava, ma e faapea mai le sui sooupu e lē mamao ma le aiga na maua i le osofaiga i le vaiaso na tea nei.
O le osofaiga muamua lea i Tiavi na maua ai foi ni laau maualuluga o le maruana ma sa molia ai se tamā mai lea pitonuu.
E lē o mafai ona maua se faatagaga o le tusitala e silasila ai i laau e 47 na maua mo le pueina o se ata, i le faamatalaga a leoleo seiloga e mae‘a suesuega ona faato‘ā maua lea o se avanoa faapea.
O se isi osofaiga foi a leoleo talu ai nei na maua ai foi laau faasāina o le maruana i se aiga i Vaitele-uta.
Le osofaiga lea na faitioina ai e lea aiga le galuega a leoleo ona e faapea, na tetei i le vaveao i le sueni o ieafu o loo momoe.
O le tamā o le aiga e susue atu le ieafu i sailiga e ala i le tusi faataga mai le faamasinoga poo le search warrant, e lē o faia se lavalava.
O le faaseā a lea tamā na tali ai le Komesina o Leoleo ma ia faamalamalama e faapea, o le faatinoga o le malosiaga o le tusi faataga, e lē tau faia ai ni feiloaiga ma faailoa le galuega o le a fai.
E mafua ona afai e talanoa muamua ma faamalamalama le galuega a leoleo, e oo atu i le taimi e sue ai le fale ma le fanua o se aiga, ua lē maua laau faasāina poo nisi mea e aafia i se suesuega tau solitulafono.
