“E toalua nisi tamalii e iai agavaa sa talosaga i le avanoa ae e lei filifilia”…Levaopolo Talatonu
O talosaga sa tuuina atu mo le avanoa o le Pule Sili o le faalapotopotoga o le malosi faaeletise na aofia ai ma le talosaga a se tasi o tamalii sa tele tausaga o seei i le tofiga Pule Sili o lea faalapotopotoga, le tofa Toluono Feti.
Faaalia e le minisita faataitai poo le shadow minister mo galuega tetele e aofia ai le EPC a le Itu agai, le tofa Levaopolo Talatonu, o se tasi lea o tamalii e maualuluga ona faailoga inisinia i galuega tau eletise, o se isi faaupuga, o loo ia te ia agavaa ma tomai e talafeagai tonu ma le tofiga, e ui ua mae‘a ona faia le faaiuga a le Kapeneta ma ua filifilia le Pule Sili, le susuga Tologata Tile.
O le tofa Toluono Feti e pei ona faaalia e Levaopolo Talatonu e lei filifilia e le komiti sa iloiloina tusi talosaga mo le vaega o faatalatalanoaga poo interviews ae o se tasi o laui‘a e fetaui tonu ma le tofiga.
O le tofia o le pule o lea faalapotopotoga o loo fesiligia ai e le Itu agai le faaiuga a le kapeneta na toe suia ai le fautuaga a le minisita o le taitaifono ma le komiti faafoe o le EPC i se tasi o tagata faigaluega sinia a le faalapotopotoga le susuga Aumalaga na filifilia mo le avanoa. E lē o fesiligia e le Itu agai agavaa ma tomai o le Pule Sili fou ua tusi aao i ai le kapeneta, ae o loo fesiligia le faaiuga a le kapeneta na lē tausisia ai aiaiga o le tulafono e tofia ai se Pule Sili o le EPC.
Faaalia e Levaopolo i se feiloaiga ma tusitala, ua soli e le Malo aiaiga o le tulafono ma ua atagia ai lo latou lē usitaia o faaiuga a le Palemene na pasia ai tulafono mo le tofia o faauluuluga o Matagaluega ma Faalapotopotoga a le Malo. E toalua tagata e fetaui tomai ma agavaa sa talosaga mo le avanoa ae e lei filifilia e pei ona faaalia e le minisita faaolioli o Galuega a le Itu agai.
Peitai e lei faailoaina mai e Levaopolo poo ai ia sui e toalua seia vaganā lona faapea mai i tusitala, o lē sa filifilia e le minisita ma le komiti le isi e agavaa faapea ai ma le tofa Toluono e lei lautogia mo le vaega o faatalatalanoaga. Ua aumai se finagalo o le Palemia i le mataupu na laga e le Itu agai, ma ua ia faaalia ai le talafeagai o le faaiuga na faia e le kapeneta ma tomai ma agavaa o le tamalii ua filifilia.
Ua saunoa ai foi le Palemia e faapea, o le toe fesiligia e le Itu agai o le faaiuga ua uma ona fai, ua faamamasagia ai ma le tamalii ua avea nei ma Pule Sili. Peitai ua saunoa Tuilaepa o se tasi sa faauluulu i ai le poloketi o afi eletise e alu i le suauu tiso lea o loo fausia ai le nofoaga fou i Fiaga. Ua 24 foi tausaga o galue ma tautua i le faalapotopotoga.
