Se mea lava ina a lelei o uso ae fealofani ma felagolagomai. E lei ‘alo i le ataata o le laau le paia ma le mamalu o le alalafaga i alo ma tamafanau faapea paolo ma gafa e malu ai lenei nuu o Sapunaoa o alaala i Brisbane ae tainane o lupe faalele a le alalafaga, auā e faigata o le alalafaga o le itumalo e afua mai ai le suafa o le aulakapi tautaua a Samoa.
O le paia lava lea i le mamalu o la latou Toafā ma Alo o Fanene ma le Lotoifale o le fale Manu Samoa. E lei falala fua lava le niu e pei ona faamaopoopo ai le mafutaga i Brisbane a o loma le to‘ai taunuu mai o le faigamalaga mai Samoa, ma e lē o se taimi itiiti foi na tapena i ai mo lenei faamoemoe.
Talu ai ona o le fia fausiaina o le Maota o le Galuega ma le hall a le Ekalesia, na lafo mai ai le fanoga i le Mafutaga i Brisbane, o le auga lea o lenei faamoemoe.
O le Aso Toonai la, aso 12 Novema na fesilafai ai ma feiloai le aumalaga mamalu mai Samoa faapea le loaloa o le mafutaga i Brisbane ma i se Po Siva.
O nisi o le aumalaga mai Sapunaoa i Samoa e aofia ai le Taitaifono, le tofa ia Leavasā Faalata ma le failautusi ia Taituuga Esau ma nisi o sui mamalu na malaga mai.
Na muai taitaia i se sauniga lotu na saunia e le susuga i le Toeaina ia Rev Tauaaga Mataafa o le Pulega a EFKS Saute (Lupe Faalele a le alalafaga).
Sa fai ma fofoga o le aso le tofā a le Tootoo Lea‘ava le fetalaiga ia Maaelopa Pesamino Taefu.
O le susuga foi ia Faifaimalie Taituuga Lepau Ioelu o se tasi lea o faafeagaiga taulagi a le afioaga o i latou uma nei o loo faatautaia le mafutaga i totonu o Brisbane ma nisi.
Na faaalia ai le valevalealofa o le paia ma le mamalu o le atunuu e ala i le aao mafola i seleni ma faapea foi ona tali atu le alalafaga o Sapunaoa e ala i palapala a malo ma nisi vaega e talamasinei ai le alofa foai.
Ua afifi nei e Sapunaoa le seleni paia e tusa ma le $56,089.70 e faaagaga mo le faamoemoe o le ekalesia i Samoa.
O upu lava o le Tusi “E sili le manuia o lē foai, nai lo le na te talia”.
