O le toe filifilia mai o le faipule tamaitai o Lotofaga e aunoa ma se palota le afioga Fiame Naomi Mataafa, le toe filifilia i le faigapalota o le faipule tamaitai o Faasaleleaga Nu.1 i Sisifo le afioga Gatoloaifa‘ana Amataga Alesana Gidlow, le toe filifilia o le faipule tamaitai o Gagaifomauga Nu.1 le afioga Faimalotoa Kika Stowers, ma le filifilia mai mo le taimi muamua o le faipule tamaitai o le itumalo o Alataua i Sisifo le afioga Aliimalemanu Alofa Tuuau, o se tulaga maualuga lea i le taumafai ai o sui tauva tamaitai e to‘a 24 i le faigapalota ua mae‘a.
E lima nofoa o le Palemene ua mautu i teuteuga o le Faavae mo le ituvai o tamaitai. E toafā ua manuia mai i le faiga filifiliga aoao a le atunuu ma e toe toatasi lava se sui tamaitai ona atoa lea o le toalima o faipule tamaitai o le saofaiga fou a le paeaiga fou lona 16 a le Palemene o Samoa.
O lona uiga o sui tauva tamaitai e to‘a 20 e lei ausia le manumalo i le aofaiga o palota na maua i faaiuga a itumalo, o le a fili mai ai se toatasi. Sa fesiligia le afioga Fiame Naomi Mataafa poo le ā sana silasila o ai se tamaitai sa tauva e ono maua le nofoa e tasi o loo manaomia e maua ai le toalima o faipule tamaitai.
O lana tali o le sui tauva tamaitai mai le itumalo o Gagaemauga Nu.2 le afioga Seuoti Sheryl Fialuma Laauli Siliniu Muagututia e ono sao ai i le avanoa lea e pei ona teuteu ai le faavae o le atunuu.
O teuteuga nei ua faamautu ai aiaiga mo le sailia o se sui tamaitai e faaatoa ai le toalima pe afai e lē maua mai le fuainumera lea i le faaiuga o se palota e sailia ai tofi o le Palemene.
E lei maua se avanoa e fesiligia ai le Sui Komesina o faigapalota i le tulaga lea, ona o le taimi nei o loo faamaopoopo le faaiuga o le faitauga muamua e lei aloaia o palota ma palota faapitoa.
O le aso e mae‘a ai o le a mafai ai lona ona faigofie ona saili le aofaiga o palota a se itumalo na faia pe afai sa tauva ai se sui tamaitai, ona iloa ai lea o le sui o le a atoa ai le toalima.
E foliga mai la pe afai e moni o le itumalo o Gagaemauga Nu.2 o le a maua ai le toalima o faipule tamaitai, ona lua ai lea o nofoa o lea itumalo i le Palemene aemaise o le siitia ai le aofaiga o nofoa o le Palemene mai le 49 i le 50.
O le paeaiga fou a le Palemene o le a faamauina i talafaasolopito o upufai o Malo o Samoa o le a maua ai se toalima o faipule tamaitai talu ona maua le Malo Tutoatasi o Samoa.
