O le afioga Faumuina ma Fiame na totoe i le taamilosaga mulimuli ma faia loa i ai le palota faaiu lea na tulai mai ai le afioga Fiame Naomi Mataafa ua manumalo i palota e 19 ae o Faumuina e 12 palota ia maua.
O le taunuuga lenei o le filifilia o se sui taitai ua faatoa saofagā atu ai se tamaitai faipule e sosoo ma le taitai auā talu mai le faavaeina o le vaega faaupufai o le itupa o alii lava sa mafuli i ai le filifiliga o lea tofiga tāua.
O le ata foi lea ua iloa ai nei o lea faatoa maualuga le lagolagoina o le afioga i le faipule o Lotofaga o se tasi o sui sinia ma ua leva i le vaega faaupufai e ala i le palota faalilolilo a le faafaletui.
E iai sui faipule o le HRPP sa toe manumalo mai ma isi o le taimi muamua lenei ua filifilia ai, e lei auai i le uluai fono a le faafaletui i le mae‘a o le faigapalota tele a le atunuu. O nisi o loo iai nisi o tuatuagia tāua a o nisi o loo faatalitali pea i le faitauga mulimuli ma le faitauga o palota faapitoa ona e lē o mamao se va o loo manumalo ai ma le isi sui tauva.
Pe a fua ia i latou sa auai i le uluai fono faafaletui a le HRPP sa filifilia ai le sui taitai ma le taitai e lata lava i le to‘a fāsefulu peitai a fua le 19 palota na manumalo ai le afioga Fiame ma le 12 na maua e Faumuina Tiatia Liuga e na o le 31 na palotaina le sui taitai. O le avea o le faipule tamaitai o le itumalo o Lotofaga ma sui taitai e lē o manino mai e tusa o se molimau na fesiligia pe o le a avea ai ma Sui Palemia.
Faaalia e le molimau o le filifliga o le Sui Palemia o le faaiuga tutasi lea a le Palemia ona e iai vaega o le faavae e fai si lavelave i lona faataatiaga mai o le filifilia o se Sui Palemia o le Malo.
O le tulaga masani lava sa iai o le sui e manumalo e avea ma sui taitai o ia foi lena e avea ma Sui Palemia, peitai la e ese le tulaga lea ua aliali mai pe afai e faamaonia faamatalaga ua oo mai.
O tofiga o le Fofoga Fetalai ma le Sui Fofoga Fetalai faapea le Sui Palemia o lea ua taatia se‘i mae‘a le faitauga mulimuli aloaia ma faamautu le faaiuga o le palota ona faatoa silasila lea i ai o faipule o le HRPP.
