O le tausaga lenei 2016 e atoa i ai le 25 tausaga talu ona faavae mai le faalapotopotoga a le Miss Samoa New Zealand.
Ma e pei ona faatulaga ai le sailia o se tamaitai lalelei e manumaloina le pale o le Tausala Samoa Niu Sila, le Miss Samoa New Zealand, mo lenei tausaga 2016, na faaalia i se pepa o faamatalaga mai le pulega a le Miss Samoa New Zealand, e tusa ma le to‘a 16 tamaitai na faaulu o latou suafa e fia auai i lea tauvaga. Ae ina ua faia le filifiliga a le laulau o faamasino, ua filifilia ai loa na o le toafitu o tamaitai o le a faia i ai le filifiliga faaiu.
O le laulau o faamasino sa aofia ai tamaitai na muai manumalo i lenei pale o le Miss Samoa New Zealand i tausaga ua mavae, o se tasi o tamafanau a Samoa ua iloga i le tomai o le mamanuina o laei (Established Samoan Designer), o se Professional Pacific Choreographer faapea le Faatonu o le faalapotopotoga a le Miss Samoa NZ.
E pei ona silafia o le lona tolu ai nei o tausaga talu ona amata faatinoina lenei tauvaga i luga o fesootaiga o le initaneti (online competition), ma ua faamaonia le sologa lelei o lenei fuafuaga, aemaise i le itu o le leai o se tupe faaalu ai a tamaitai tauva ma o latou aiga.
O suafa la nei o tamaitai e toafitu o le a faia i ai le filifiliga faaiu, e pei ona faalauiloa mai e le Pacific Events & Entertainment Trust Board & komiti a le Miss Samoa New Zealand:
Naomi Eta Fruean (21 tausaga) Afioaga: Lotofaga Aleipata, Motootua
Agnelia Brown (23 tausaga) Afioaga: Lotopa, Faleapuna, Fugalei
Malaea Evile (20 tausaga) Afioaga: Apolima, Taufusi, Levili, Faatoia
Julia Lui (20 tausaga) Afioaga: Leauvaa, Satuimalufilufi
Rebecca Nielsen (24 tausaga) Afioaga: Avao, Alamagoto, Vaivase
Mariana Tanuvasa (19 tausaga) Afioaga: Nofoalii
Rebecca Sang Yum (18 tausaga) Afioaga: Siufaga Falelatai
E 2 Vaega o le a tauva ai nei tamaitai i le afiafi o le a faia ai le filifiliga faaiu; o le Taleni ma le Faatalanoaga (Talent & Stage Interview). E mae‘a lena ona auauai lea o tamaitai uma taitoatasi e faaiu a latou tapenapenaga uma i lana Siva Samoa poo lana Taualuga.
O le tamaitai o le a manumalo i le pale o le Miss Samoa New Zealand 2016-2017, o le a faapaleina e le tamaitai lalelei o Christina Taefu, lea o loo tauaveina lena pale o le Miss Samoa NZ i le taimi nei. O lea sauniga faapitoa o le a faia faatasi ma se taumafataga i le Aso Toonai, 23 o Iulai i le Holiday Inn Airport, i Magele. Ua lē o toe mamao ona faatauina lea i tua o pepa ulufale mo lea faamoemoe.
O loo maua uma nisi faamatalaga o lenei faamoemoe tāua pe a agai i le Imeli: misssamoanzpageant@gmail.com; Facebook.com/misssamoanewzealand; poo le Telefoni Feaveai: +64 21 138 6575.
